نیویارک سٹی کے محکمہ صحت نے تصدیق کی ہے کہ اپر ایسٹ سائیڈ میں لیجیونیئرز بیماری کے مریضوں کی تعداد بڑھ کر 18 ہو گئی ہے۔
حکام کے مطابق بیماری کا پھیلاؤ یارک وِل اور کارنیگی ہِل کے علاقوں اور 10075، 10028 اور 10128 زپ کوڈز تک محدود ہے۔ گزشتہ موسم گرما میں ہارلم میں لیجیونیئرز بیماری سے سات افراد ہلاک جبکہ 100 سے زائد بیمار ہوئے تھے۔لیجیونیئرز بیماری میں عام طور پر کھانسی، بخار اور سانس لینے میں دشواری جیسی فلو سے ملتی جلتی علامات ظاہر ہوتی ہیں۔ محکمہ صحت کے مطابق یہ بیماری ایک شخص سے دوسرے شخص میں منتقل نہیں ہوتی بلکہ آلودہ کولنگ ٹاور سے خارج ہونے والی باریک پانی کی بوندوں یا دھند کو سانس کے ذریعے اندر لینے سے پھیلتی ہے۔ کمزور مدافعتی نظام رکھنے والے افراد، دائمی پھیپھڑوں کے مریض، سگریٹ یا ویپ استعمال کرنے والے افراد اور 50 سال یا اس سے زیادہ عمر کے لوگ اس بیماری سے زیادہ متاثر ہو سکتے ہیں۔ اس کا علاج اینٹی بائیوٹکس سے ممکن ہے۔