چین کی پیکنگ یونیورسٹی کی ینچنگ اکیڈمی نے بین الاقوامی طلبہ کے لیے چائنا اسٹڈیز میں دو سالہ ماسٹرز پروگرام کے لیے ستمبر 2027 کے داخلوں کی درخواستیں طلب کر لی ہیں۔ منتخب طلبہ کو ینچنگ فیلوشپ کے تحت ٹیوشن فیس، رہائش، ماہانہ وظیفہ اور میڈیکل انشورنس سمیت مکمل مالی معاونت ملے گی۔
فیلوشپ کے پہلے سال میں ٹیوشن فیس، ینچنگ اکیڈمی ہاؤس میں رہائش، بیجنگ کا ایک طرفہ ہوائی سفر، بنیادی میڈیکل انشورنس، ماہانہ وظیفہ اور تحقیقی اخراجات شامل ہیں۔ دوسرے سال کی فنڈنگ اچھی تعلیمی کارکردگی اور منظوری سے مشروط ہے۔ درخواست دینے کے لیے غیر چینی شہری ہونا اور کسی بھی مضمون میں بیچلرز ڈگری ہونا ضروری ہے، یا اگست 2027 تک ڈگری مکمل ہونی چاہیے۔ چینی زبان کا تجربہ لازمی نہیں۔ انگریزی کی مہارت کے لیے آئی ایلٹس میں کم از کم 7.0 یا ٹوفل میں 100 اسکور درکار ہے، تاہم انگریزی میڈیم تعلیم والے امیدواروں کو چھوٹ مل سکتی ہے۔ درخواست کے ساتھ 750 الفاظ کا ذاتی بیان، 1500 الفاظ تک کا تحقیقی دلچسپی کا بیان، دو صفحات کا سی وی، تعلیمی ٹرانسکرپٹس، ڈگری سرٹیفکیٹ اور دو پروفیسرز کے سفارشی خطوط جمع کرانا ہوں گے۔ عام امیدواروں کے لیے آخری تاریخ 30 نومبر 2026 ہے، جبکہ پارٹنر یونیورسٹیوں سے نامزد امیدوار 7 دسمبر 2026 تک صبح 9 بجے بیجنگ ٹائم تک درخواست دے سکتے ہیں۔ پروگرام کا آغاز یکم ستمبر 2027 کو ہو گا۔