سردیوں میں گرم پانی سے غسل کرنا کافی سکون دیتا ہےاور بعض افراد دیر تک گرم پانی کے نیچے کھڑے رہنا پسند کرتے ہیں، جس سے جسم کو گرمی تو ملتی ہے لیکن ساتھ ہی زیا دہ تیز گرم پانی کا استعمال ہمارے لیے نقصان دہ بھی ثا بت ہوسکتا ہے ۔
اے آروائی نیوز کے مطا بق کیا آپ جانتے ہیں کہ بہت زیادہ گرم پانی سے روزانہ غسل کرنے کی عادت آپ کی جلد کو خشک اور بے رونق بنا سکتی ہے؟ خاص طور پر جن لوگوں کی جلد پہلے سے خشک یا حساس ہے، انہیں غسل کرتے وقت کچھ باتوں کا خیال رکھنا چاہیے۔جلد کی بیرونی تہہ جسم میں نمی برقرار رکھنے اور بیرونی چیزوں سے حفاظت کرنے میں مدد کرتی ہے۔ جلد پر موجود قدرتی تیل بھی اس تہہ کو محفوظ رکھنے میں اہم کردار ادا کرتے ہیں۔
تیز گرم پانی سے بار بار یا طویل وقت تک نہانے سے جلد میں کھنچاؤ، خارش جیسی پریشانی بھی ہو سکتی ہے۔ جن لوگوں کو ایکزیما جیسی جلد کی بیماری ہے، ان میں بہت زیادہ گرم پانی ان علامات کو بڑھا سکتا ہے۔ نہانے کے لیے ہلکا نیم گرم پانی بہتر متبادل ہے۔ پانی اتنا گرم نہیں ہونا چاہیے کہ جلد سرخ ہونے لگے یا نہاتے وقت جلن محسوس ہو۔ایسا کوئی ایک درجۂ حرارت نہیں ہے جو ہر شخص کے لیے بالکل درست ہو، لیکن آرام دہ نیم گرم پانی کا انتخاب کرنا اور بہت زیادہ گرم پانی سے بچنا مفید ہے۔
تیز خوشبو والی اور جلد کو خشک کرنے والی مصنوعات کے بجائے نرم کلینزر کا انتخاب کریں۔ جلد کو زور زور سے رگڑنے سے بھی گریز کریں اور نہانے کے فوراً بعد موئسچرائزر لگائیں۔تاہم ان چھوٹی چھوٹی عادتوں سے سردیوں میں بھی جلد کو خشکی سے بچانے میں مدد مل سکتی ہے۔