نیویارک(ویب ڈیسک) نیویارک سٹی کے میئر ایرک ایڈمز اور اعلیٰ ٹیکنالوجی افسر میتھیو فریزر نے کم سہولت یافتہ برادریوں کے لیے 2.4 ملین ڈالر کی ڈیجیٹل اکویٹی سرمایہ کاری اور نیویارک ڈیجیٹل اکویٹی منصوبہ کے آغاز کا اعلان کیا ہے۔
میئر ایڈمز نے کہا اس اقدام کے تحت کم سہولت یافتہ برادریوں کو برقی آلات، انٹرنیٹ اور ڈیجیٹل تعلیم تک بہتر رسائی فراہم کی جائے گی۔ انہوں نے کہا یہ منصوبہ 11 نئے اقدامات پر مشتمل ہے، جن میں عوامی کتب خانوں اور بزرگ مراکز میں کمپیوٹر لیبز کی جدید کاری، موبائل کمپیوٹر سہولتوں میں اضافہ، اور ایک اعلیٰ ڈیجیٹل برابری افسر کی تقرری شامل ہے۔ یہ اقدام ایڈمز انتظامیہ کے بگ ایپل کنیکٹ منصوبے کا تسلسل ہے، جو 220 سے زائد عوامی رہائشی منصوبوں میں 3 لاکھ 30 ہزار شہریوں کو بلا معاوضہ انٹرنیٹ فراہم کر رہا ہے۔ میئر نے کہا منصوبے کے تحت شہریوں کو آن لائن سرکاری خدمات، روزگار کے مواقع، اور دھوکہ دہی سے بچاؤ کے لیے مدد بھی فراہم کی جائے گی۔ انہوں نے مزید کہا نیویارک پہلے ہی 450 سے زائد عوامی کمپیوٹر مراکز اور 2,000 سے زائد برقی رابطہ مراکز کے ذریعے ملک میں سب سے زیادہ مفت انٹرنیٹ فراہم کرنے والا شہر بن چکا ہے۔ میئر ایڈمز نے کہا کہ ڈیجیٹل سہولتیں بنیادی ضرورت بن چکی ہیں اور ان اقدامات کے ذریعے ہر شہری کو ترقی کے مساوی مواقع دیے جائیں گے۔