نیویارک(بیورو رپورٹ)انڈین قونصل خانہ نیویارک میں دیوالی کے موقع پر ایک رنگا رنگ تقریب کا انعقاد کیا گیا، جس کا اہتمام انڈین قونصل خانے اور دیسی سوسائٹی آف نیویارک پولیس ڈیپارٹمنٹ نے مشترکہ طور پر کیا۔ یہ تقریب ہندوستانی ثقافت، روایات اور دوستی کے جذبے کو فروغ دینے کے لیے منعقد کی گئی، جس میں قونصل خانے کے عملے، نیویارک پولیس ڈیپارٹمنٹ کے دیسی سوسائٹی کے اراکین اور مختلف معزز شخصیات نے شرکت کی۔
نیویارک میں انڈین قونصل خانہ نے دیوالی کے موقع پر ایک شاندار تقریب کا انعقاد کیا، جسے دیسی سوسائٹی آف نیویارک پولیس اور کریکشن ڈیپارٹمنٹ کے تعاون سے منظم کیا گیا۔ تقریب کی شروعات خیر مقدمی کلمات سے ہوئی، جس میں دیوالی کے تہوار کو نہ صرف روشنی اور خوشیوں کا تہوار قرار دیا گیا بلکہ اس کے ذریعے معاشرتی ہم آہنگی اور محبت کا پیغام بھی ملا۔ تقریب کا باقاعدہ آغاز بھارت و امریکہ کے قومی ترانوں سے ہوا۔تقریب میں دیوالی کی مناسبت سے رنگ برنگے روایتی لیمپ اور چراغ جلائے گئے، جو تہوار کی روح کو اجاگر کرتے ہیں۔ تقریب میں ثقافتی سرگرمیاں بھی شامل تھیں جن میں بھارتی رقص اور موسیقی کی خصوصی پرفارمنس پیش کی گئیں، جنہیں شرکاء نے خوب سراہا۔قونصل خانے کے عملے نے تقریب میں شرکاء سے مخاطب ہوتے ہوئے دیوالی کی اہمیت پر روشنی ڈالی۔ انہوں نے کہا کہ اس طرح کے ایونٹس سے مختلف ثقافتوں اور قومیتوں کے درمیان دوستی کے رشتے مضبوط ہوتے ہیں اور مختلف کمیونٹی کو ایک دوسرے کے قریب لانے کا موقع ملتا ہے۔تقریب میں نیویارک سٹی کریکشن ڈپارٹمنٹ کی دیسی سوسائٹی سے وابستہ ڈاکٹر مریم سنگھ نے دیوالی کی مبارکباددیتے ہوئے تمام شرکاء کے تعاون کا شکریہ ادا کیا۔پروگرام میں نیو یارک پولیس کے دیسی سوسائٹی کے ارکان کے ساتھ ساتھ مسلم آفیسر سوسائٹی کے صدرانسپکٹر عدیل رانا بھی شریک ہوئے۔ عدیل رانا نے تقریب میں شرکت کرکے دونوں کمیونٹی کے مابین ہم آہنگی اور یکجہتی کی مثال قائم کی۔پروگرام میں نیویارک پولیس ڈیپارٹمنٹ کی دیسی سوسائٹی کے ارکان کی بھرپور شرکت رہی۔ انہوں نے کہا کہ اس قسم کے مواقع نہ صرف ہندوستانی ثقافت کو سمجھنے کے لیے اہم ہیں بلکہ مختلف پیشہ ورانہ شعبوں میں کام کرنے والی بھارتی کمیونٹی کے افراد کے درمیان ہم آہنگی کو فروغ دینے میں بھی مددگار ثابت ہوتے ہیں۔اس موقع پر ڈاکٹر مریم کی خدمات کو سراہا گیا اور بھارتی ثقافتی ورثے کو فروغ دینے میں ان کی کاوشوں کے اعتراف میں ایوارڈ پیش کیا گیا۔ اس کے علاوہ دیگر افراد کو بھی نمایاں خدمات پر اعزازات دئیے گئے۔تقریب کے آخر میں دیوالی کے روایتی کھانوں سے شرکاء کی تواضع کی گئی،تقریب کے شرکاء نے دیوالی کے تہوار کو ایک یادگار لمحے کے طور پر منایا اور دونوں ممالک کے مابین تعلقات کو مزید مضبوط کرنے کی امید ظاہر کی۔