نیویارک کے میئر زوہران ممدانی نے شہر میں رہائشی بحران سے نمٹنے کے لیے برونکس اور بروکلین کے مختلف علاقوں میں نئے نیبرہڈ پلانز شروع کرنے کا اعلان کر دیا ہے۔
ان منصوبوں کے تحت سستی رہائش، روزگار کے مواقع، چھوٹے کاروباروں کی مدد اور بنیادی ڈھانچے کی بہتری پر توجہ دی جائے گی۔شہری انتظامیہ کے مطابق منصوبوں کا مرکز برونکس کی وائٹ پلینز روڈ اور بروکلین میں کونی آئی لینڈ و میکڈونلڈ ایونیو کے علاقے ہوں گے، جہاں پرانی زوننگ پالیسیوں کی وجہ سے نئی تعمیرات محدود رہی ہیں۔ حکام کا کہنا ہے کہ ان علاقوں میں ٹرانزٹ سہولت موجود ہونے کے باوجود رہائشی ترقی نہ ہونے کے باعث عوام کو مشکلات کا سامنا ہے۔میئر ممدانی کے مطابق نئے منصوبوں کے ذریعے مستقل سستی رہائش، بہتر عوامی مقامات اور مقامی کاروباروں کو فروغ دیا جائے گا، جبکہ ہر مرحلے میں مقامی کمیونٹی کو شامل رکھا جائے گا۔ادھر شہری منصوبہ بندی کے محکمے نے اعلان کیا ہے کہ آئندہ چند ماہ میں عوامی مشاورت، سروے اور کمیونٹی پروگرامز کے ذریعے تجاویز تیار کی جائیں گی۔ حکام کے مطابق ان منصوبوں کا مقصد مستقبل میں بڑھتی آبادی، ٹرانسپورٹ ضروریات اور مہنگائی کے دباؤ سے نمٹنے کے لیے زیادہ قابلِ رہائش اور متوازن شہر تشکیل دینا ہے۔