امریکی محکمۂ انصاف نے ریاست مینیسوٹا کے خلاف ایک نیا مقدمہ دائر کر دیا ہے، جس میں مؤقف اختیار کیا گیا ہے کہ ریاست نے عالمی گرین ہاؤس گیسوں کے اخراج کو کنٹرول کرنے کی کوشش کر کے وفاقی اختیارات میں مداخلت کی ہے۔
حکام کے مطابق یہ اقدام وفاقی قانون اور آئین کے منافی ہے۔محکمۂ انصاف کا کہنا ہے کہ مینیسوٹا نے توانائی کمپنیوں کے خلاف ریاستی عدالت میں مقدمات دائر کر کے نہ صرف عالمی سطح پر توانائی کی پیداوار کو متاثر کرنے کی کوشش کی بلکہ ان کمپنیوں کے منافع پر بھی اثر انداز ہونے کی کوشش کی ہے۔ حکومت کے مطابق ایسے اقدامات قومی توانائی پالیسی کو متاثر کرتے ہیں، جو صرف وفاقی حکومت کے دائرہ اختیار میں آتی ہے۔حکام نے مؤقف اختیار کیا کہ صدر ڈونلڈ ٹرمپ کی پالیسی کے مطابق امریکا میں سستی اور قابلِ اعتماد توانائی کو فروغ دینا ضروری ہے، جبکہ ریاستی سطح پر اس قسم کی مداخلت ملک کی معاشی اور قومی سلامتی کو کمزور کر سکتی ہے۔ محکمۂ انصاف نے عدالت سے درخواست کی ہے کہ مینیسوٹا کے ان اقدامات کو فوری طور پر روکا جائے۔یہ مقدمہ ایسے وقت میں سامنے آیا ہے جب اس سے قبل بھی محکمۂ انصاف ہوائی، مشی گن، نیویارک اور ورمونٹ جیسی ریاستوں کے خلاف اسی نوعیت کی قانونی کارروائیاں کر چکا ہے، جس سے وفاق اور ریاستوں کے درمیان ماحولیاتی پالیسیوں پر اختلافات مزید گہرے ہوتے جا رہے ہیں۔