نیویارک کے میئر زوہران کوامی ممدانی اور امریکی رکن کانگریس رچی ٹوریس نے کم آمدنی والے شہریوں کو تیز رفتار مفت انٹرنیٹ فراہم کرنے کے لیے “نیبرہڈ انٹرنیٹ” پروگرام میں توسیع کا اعلان کر دیا ہے، جس کے لیے 20 لاکھ ڈالر کی نئی فنڈنگ مختص کی گئی ہے۔
حکام کے مطابق اس پروگرام کے تحت برونکس اور اپر مین ہیٹن کے 700 سے زائد کم آمدنی والے گھرانوں کو موسمِ گرما تک مفت براڈ بینڈ انٹرنیٹ فراہم کیا جائے گا، جبکہ آئندہ دو برسوں میں ہزاروں مزید گھروں تک اس سہولت کو وسعت دی جائے گی۔میئر ممدانی کا کہنا ہے کہ انٹرنیٹ تک رسائی روزگار، تعلیم اور روزمرہ زندگی کے مواقع سے جڑی ہوئی ہے، لیکن اب بھی بڑی تعداد میں شہری اس بنیادی سہولت سے محروم ہیں۔ انہوں نے کہا کہ یہ اقدام ڈیجیٹل فرق کو کم کرنے اور شہر کو مزید مربوط بنانے کی جانب اہم قدم ہے۔یہ پروگرام نیویارک پبلک لائبریری اور محکمہ ہاؤسنگ کے اشتراک سے چلایا جا رہا ہے، جس کے تحت کم آمدنی والے رہائشی علاقوں میں مفت وائی فائی اور تیز رفتار انٹرنیٹ کی سہولت فراہم کی جا رہی ہے۔ حکام کے مطابق اس اقدام سے خاص طور پر برونکس کے ان علاقوں کو فائدہ پہنچے گا جہاں انٹرنیٹ تک رسائی کی شرح سب سے کم ہے۔