نیویارک کے میئر نے جائیدادوں پر قبضے اور فراڈ کے بڑھتے واقعات کے پیش نظر ایک اہم قدم اٹھاتے ہوئے “میئر آفس آف ڈیڈ تھیفٹ پریوینشن” کے قیام کا اعلان کر دیا ہے، پیٹر وائٹ کو اس کا پہلا ڈائریکٹر مقرر کیا گیا ہے۔
حکام کے مطابق ڈیڈ تھیفٹ ایک ایسا جرم ہے جس میں جعلسازی کے ذریعے گھروں کی ملکیت منتقل کر کے مالکان کو بے دخل کر دیا جاتا ہے۔ گزشتہ برسوں میں اس نوعیت کے ہزاروں کیسز سامنے آئے، خاص طور پر بروکلین اور کوئنز کے علاقوں میں، جہاں سیاہ فام کمیونٹیز زیادہ متاثر ہوئیں۔میئر کا کہنا تھا کہ گھر کا چھن جانا صرف ایک جائیداد کا نقصان نہیں بلکہ ایک خاندان کے مستقبل اور نسلوں کی محنت کا خاتمہ ہوتا ہے۔ انہوں نے واضح کیا کہ شہر اب اس جرم کے خلاف مکمل حکومتی طاقت استعمال کرے گا اور متاثرہ خاندانوں کو تحفظ فراہم کیا جائے گا۔حکام کے مطابق اس اقدام کا مقصد نہ صرف فراڈ کی روک تھام ہے بلکہ ایسے متاثرہ شہریوں کو قانونی اور مالی رہنمائی فراہم کرنا بھی ہے تاکہ وہ اپنی جائیداد کا تحفظ کر سکیں اور پیچیدہ قانونی عمل سے بہتر طریقے سے نمٹ سکیں۔