امریکی ریاست ٹیکساس میں میکسیکو کی سرحد کے قریب واقع ریلوے یارڈ میں ایک مال بردار ٹرین کے ڈبے سے 6 افراد کی لاشیں برآمد ہوئی ہیں۔
پولیس کے مطابق لاشیں لاریڈو شہر کے ریلوے یارڈ میں ملی ہیں، جس کے بعد ٹرین کو شمال کی طرف روانہ ہونے سے روک دیا گیا۔ ابتدائی معلومات کے مطابق جس وقت لاشیں ملیں، درجہ حرارت 90 ڈگری فارن ہائیٹ (تقریباً 32 ڈگری سینٹی گریڈ) سے زیادہ تھا۔حکام نے بتایا کہ ابھی تک مرنے والوں کی شناخت، عمر اور امیگریشن حیثیت معلوم نہیں ہو سکی۔ واقعے کی مکمل تحقیقات جاری ہیں اور ابھی کسی حتمی نتیجے پر نہیں پہنچا جا سکا کہ اموات کیسے ہوئیں۔یہ واقعہ ایسے وقت میں پیش آیا ہے جب ٹیکساس-میکسیکو سرحد پر غیر قانونی نقل مکانی اور اسمگلنگ کے واقعات پہلے ہی حساس مسئلہ بنے ہوئے ہیں۔ ماضی میں بھی اسی علاقے میں ٹرین یا ٹرکوں کے ذریعے اسمگلنگ کے دوران انسانی جانوں کے ضیاع کے واقعات رپورٹ ہو چکے ہیں۔حکام نے کہا ہے کہ تحقیقات مکمل ہونے کے بعد ہی واضح ہو سکے گا کہ یہ اموات حادثہ تھیں، اسمگلنگ سے جڑی ہیں یا کسی اور وجہ سے پیش آئیں۔