فلوریڈا(ویب ڈیسک) امریکی ریاست فلوریڈا کے رہائشی روجر وٹ مین کو ٹیکس چوری کے الزام میں 24 ماہ قید کی سزا سنائی گئی ہے۔
امریکی محکمہ انصاف کے جاری کردہ پریس ریلیز کے مطابق، ملزم روجر وٹ مین نے اپنی کاروباری آمدنی پر تقریباً 24 لاکھ ڈالر کے ٹیکس سے بچنے کی کوشش کی تھی۔ عدالتی دستاویزات کے مطابق، وٹ مین 2002 سے 2018 کے درمیان "رائف مشینز” نامی آلات تیار اور فروخت کرتا رہا جو مبینہ طور پر مختلف طبی مسائل کا علاج کرنے کے لیے توانائی کی لہروں کا استعمال کرتے ہیں۔ اس عرصے میں اس نے لاکھوں ڈالر کمائے، لیکن اس نے 1997 کے بعد کبھی انکم ٹیکس ریٹرن فائل نہیں کیا اور 2000 کے بعد کوئی ٹیکس ادائیگی نہیں کی۔ 2012 میں انٹرنل ریونیو سروس (IRS) نے اس کے خلاف 2002 سے 2009 تک کے لیے تقریباً 8 لاکھ ڈالر کے واجبات عائد کیے اور رقم وصول کرنے کی کوشش شروع کی۔ وٹ مین نے اس رقم کی وصولی کو روکنے کے لیے اپنی دوست کے نام پر ایک ٹرسٹ قائم کیا اور کاروباری آمدنی اس ٹرسٹ کے اکاؤنٹ میں منتقل کر کے ذاتی اخراجات پورے کرتا رہا۔ 2019 میں اس نے ٹیکس حکام کو مزید دھوکہ دینے کے لیے ایک نئی کمپنی بھی رجسٹر کروا لی۔ وٹ مین کی جانب سے کیے گئے ان اقدامات کے نتیجے میں IRS کو مجموعی طور پر 24 لاکھ ڈالر سے زائد کا نقصان پہنچا ہے۔ وفاقی جج جان اینٹون دوم نے ملزم کو دو سال قید، ایک سال نگرانی میں رہائی اور 23 لاکھ 14 ہزار 220 ڈالر سے زائد کی رقم بطور تاوان ادا کرنے کا حکم دیا۔ مقدمے کی تحقیقات IRS کرمنل انویسٹی گیشن نے کی، جبکہ محکمہ انصاف کے ٹیکس ڈویژن نے مقدمہ چلایا۔