ہارلیم(ویب ڈیسک) نیویارک کے علاقے ہارلیم میں فائرنگ کے واقعے میں 61 سالہ خاتون سر میں گولی لگنے سے جاں بحق ہوگئیں۔
پولیس کے مطابق، واقعہ رات 10:20 بجے 113ویں اسٹریٹ اور لینکس ایونیو پر پیش آیا، جب ایکسینیا میٹے نامی خاتون ڈیلی شاپ میں صفائی کر رہی تھیں، جہاں وہ رضاکارانہ طور پر کام کرتی تھیں۔ پولیس کا کہنا ہے کہ تین افراد کے درمیان جھگڑا ہوا، جسے سن کر خاتون باہر آئیں تاکہ یہ جان سکیں کہ کہیں ان کا نواسہ اس میں شامل تو نہیں۔ اس دوران فائرنگ کا تبادلہ ہوا اور وہ گولیوں کی زد میں آ گئیں۔ ان کا نواسہ اس وقت عمارت کی بالائی منزل پر محفوظ تھا۔ اہل علاقہ کے مطابق وہ نہ صرف اپنی فیملی بلکہ ہر کسی کا خیال رکھنے والی خاتون تھیں۔ فائرنگ کے دوران ایک 23 سالہ نوجوان داریوس اسمتھ پاؤں میں زخمی ہوا، جسے گرفتار کر کے اس پر اقدام قتل اور غیر قانونی اسلحہ رکھنے کے الزامات عائد کیے گئے ہیں۔ پولیس کا کہنا ہے کہ اسمتھ نے اپنے حریف پر فائرنگ کی، جس نے جوابی گولیاں چلائیں، اور اسی دوران خاتون جاں بحق ہوگئیں۔ اسمتھ ماضی میں بھی چوری اور چاقو زنی جیسے جرائم میں ملوث رہا ہے۔ تفتیشی حکام نے جائے وقوعہ کے قریب سے آٹھ گولیوں کے خول اور ایک آتشیں اسلحہ برآمد کیا ہے۔ پولیس مزید مشتبہ افراد کی تلاش جاری رکھے ہوئے ہے۔