واشنگٹن(ویب ڈیسک) امریکی صدر ڈونلڈ ٹرمپ نے غیر قانونی تارکین وطن کے لیے ایک نیا پروگرام شروع کرنے کا اعلان کیا ہے جس کے تحت جو افراد رضاکارانہ طور پر امریکہ کو خیرآباد کہیں گے انہیں نقد رقم اور مفت ٹکٹ فراہم کیا جائے گا۔
غیر ملکی چینل کو انٹرویو دیتے ہوئے ٹرمپ نے کہا کہ اگر یہ افراد اچھے شہری ثابت ہوں تو انہیں قانونی طریقے سے دوبارہ امریکہ آنے کا موقع بھی دیا جائے گا۔ ٹرمپ نے یہ بھی واضح کیا کہ پہلے مرحلے میں ان مجرموں کو ملک سے نکالا جائے گا جو سنگین جرائم میں ملوث ہیں۔ انہوں نے کہا کہ ہم قاتلوں کو نکال رہے ہیں۔ ان کے مطابق دیگر افراد کے لیے ”سیلف ڈیپورٹیشن پروگرام“ متعارف کروایا جائے گا۔ انٹرویو میں انہوں نے یہ بھی کہا کہ وہ ہوٹلوں اور زرعی شعبے کو درپیش افرادی قوت کے بحران کے پیش نظر ایسے افراد کو دوبارہ قانونی طریقے سے لانے پر غور کر رہے ہیں۔ اس وقت امریکہ میں موجود غیر قانونی تارکین وطن کو ہدایت کی گئی ہے کہ وہ واپسی کے ارادے سے امریکی کسٹمز اور بارڈر پروٹیکشن کی ایپ کے ذریعے اپنا اندراج کروائیں۔ ٹرمپ کا کہنا ہے، ہم سیلف ڈیپورٹیشن کروا رہے ہیں اور ہم اسے لوگوں کے لیے آرام دہ بنائیں گے، اور ہم ان کے ساتھ مل کر انہیں قانونی طور پر ملک واپس لائیں گے۔