نیویارک(ویب ڈیسک) نیویارک سٹی کے میئر ایرک ایڈمز نے میڈیکل انفارمیشن کارڈ متعارف کروانے کا اعلان کیا ہے، جو ہنگامی صورتحال میں فوری مدد فراہم کرنے میں معاون ہوگا۔
میئر ایرک ایڈمز نے اپنی 19ویں کمیونٹی میٹنگ میں سینئر شہریوں سے خطاب کرتے ہوئے شہر میں ہونے والی بہتری اور حکومتی اقدامات پر روشنی ڈالی۔ میئر ایڈمز نے کہا کہ جب وہ میئر بنے تو شہر کو جرائم، بے روزگاری، سب وے میں بدامنی، اور غیر قانونی گاڑیوں جیسے مسائل کا سامنا تھا، لیکن دو سال میں ان کی انتظامیہ نمایاں بہتری لائی ہے۔ انہوں نے بتایا کہ مزید ملازمتوں کے مواقع پیدا کیے گئے، کم لاگت کے گھروں کی تعمیر میں اضافہ ہوا، اور غیر قانونی ہتھیاروں کی بڑی تعداد میں ضبطی عمل میں آئی۔ حکام کے مطابق، 80,000 سے زائد غیر قانونی گاڑیاں ہٹائی گئیں، 20,000 سے زائد غیر قانونی ہتھیار ضبط کیے گئے، اور سب وے میں سیکیورٹی کو مضبوط بنا کر روزانہ 4.6 ملین مسافروں کو محفوظ سفری سہولت فراہم کی جا رہی ہے۔ ساتھ ہی بچوں کی فوسٹر کیئر سروسز، کالج کی فیس میں سہولت، اور بزرگوں کے لیے بہتر سہولیات پر بھی توجہ دی جا رہی ہے۔ میئر ایڈمز نے ایک میڈیکل انفارمیشن کارڈ متعارف کروانے کا اعلان بھی کیا، جو ہنگامی صورتحال میں فوری مدد فراہم کرنے میں معاون ہوگا۔