امریکی ریاست کیلیفورنیا کے محکمہ صحت نے خبردار کیا ہے کہ ریاست میں فروخت ہونے والے کچے دودھ کے ایک بیچ میں برڈ فلو وائرس ایویئن انفلوئنزا کی موجودگی کی تصدیق ہوئی ہے۔
یہ انکشاف عوامی صحت کے لیے خطرے کی گھنٹی بجا رہا ہے، کیونکہ وائرس کے پھیلاؤ کے امکانات بڑھ رہے ہیں۔حکام کے مطابق، یہ دودھ ایک مقامی ڈیری فارم سے آیا تھا اور بغیر کسی پروسیسنگ کے فروخت کیا گیا تھا۔ متاثرہ دودھ کی خریداری کرنے والے صارفین کو فوری طور پر اسے ضائع کرنے یا واپس کرنے کی ہدایت دی گئی ہے۔ برڈ فلو عام طور پر پولٹری میں پایا جاتا ہے، لیکن انسانوں میں منتقل ہونے کے امکانات اس وقت بڑھ جاتے ہیں جب لوگ متاثرہ جانوروں یا ان کی مصنوعات کے قریب رہتے ہیں۔ اگرچہ اب تک کوئی انسانی انفیکشن رپورٹ نہیں ہوا، محکمہ صحت نے ممکنہ خطرات سے بچنے کے لیے احتیاطی تدابیر اختیار کرنے کی سفارش کی ہے۔ ماہرین نےعوام کو مشورہ دیا ہے کہ وہ صرف پاسچرائزڈ دودھ اور دیگر ڈیری مصنوعات استعمال کریں اور کسی بھی مشکوک علامات پر فوری طور پر طبی مشورہ لیں۔