واشنگٹن (ویب ڈیسک) امریکی سیاسی ماہرین کے مطابق ٹیسلا موٹرز کے سی ای او ایلون مسک کا ڈونلڈ ٹرمپ کی حمایت کرنا ان کے لیے فوائد کے ساتھ متعدد چیلنجز بھی پیدا کر سکتا ہے۔
ٹیسلا اور اسپیس ایکس جیسی کمپنیوں کے مالک دنیا کے امیر ترین شخص ایلون مسک نے 2024 کے امریکی صدارتی انتخابات کے دوران ڈونلڈ ٹرمپ کی حمایت میں پرجوش مہم چلائی تھی۔اب امریکی صدارتی انتخابات میں کامیابی کے بعد ڈونلڈ ٹرمپ نے بھی کامیابی کا سہرا ایلون مسک کے سر پر سجایا۔ ٹرمپ کی جیت کے بعد سیاسی ماہرین کا کہنا ہے کہ ٹرمپ کے دور میں شرائط میں نرمی سے مسک کی کمپنیوں، جیسے ٹیسلا اور اسپیس ایکس، کو ترقی کے مواقع مل سکتے ہیں، کیونکہ کم شرائط سے ان کے آپریشنل اخراجات میں کمی آئے گی۔ توانائی اور خلائی تحقیق میں حکومتی دلچسپی اسپیس ایکس کے لیے حکومتی معاہدے حاصل کرنے میں معاون ثابت ہو سکتی ہے، جبکہ ممکنہ ٹیکس چھوٹ سے مسک کے مالی مفادات کو فائدہ ہوگا۔ اظہارِ رائے کی آزادی پر دونوں کی یکساں سوچ مسک کے پلیٹ فارمز پر حکومتی مداخلت کو کم کر سکتی ہے، جس سے اظہارِ رائے کی زیادہ آزادی ملے گی۔ لیکن ٹرمپ کے ساتھ وابستگی مسک کو صارفین کی ناراضگی، بائیکاٹس اور ممکنہ عوامی ردعمل کا سامنا بھی کروا سکتی ہے، جس سے ان کی کمپنیوں کی ساکھ اور مالی کارکردگی پر منفی اثر پڑ سکتا ہے۔ اس کے علاوہ، ٹرمپ کے دور میں لیبر قوانین میں تبدیلیاں مسک کی یونین مخالف پالیسیوں کے لیے نقصان دہ ثابت ہو سکتی ہیں۔ ٹرمپ کے غیر متوقع اقدامات مسک کی کمپنیوں کے اسٹاک کی قیمتوں میں اتار چڑھاؤ کا باعث بن سکتے ہیں، جس سے سرمایہ کاروں میں غیر یقینی کی فضا پیدا ہو سکتی ہے۔