اضافی چٹنی مانگنے پر دکاندار نے گاہک کو چاقو کے وارسے زخمی کردیا
بھارت کے دارالحکومت نئی دہلی میں عجیب و غریب واقعہ پیش آیا جہاں گاہک کو مومو کے ساتھ اضافی چٹنی مانگنا مہنگا پڑ گیا۔دہلی کے علاقے شاہدرہ میں سندیپ نامی شہری مومو کھانے گیا جہاں معمولی سی بات پر اس کا دکاندار سے جھگڑا ہوگیا۔سندیپ نے مومو آرڈر کیے جس کے ساتھ اسے کم مقدار میں چٹنی فراہم کی گئی۔ اس نے اضافی چٹنی کا مطالبہ کیا تو دکاندار نے انکار کر دیا جس کے بعد دونوں میں تلخ کلامی ہوئی۔دکاندار نے چاقو کے وار سے سندیپ کا چہرہ زخمی کر دیا اور دکان چھوڑ کر موقع سے فرار ہوگیا۔ موقع پر موجود لوگوں نے زخمی گاہک کو اسپتال منتقل کیا۔سندیپ کی حالت خطرے سے باہر ہے جبکہ پولیس نے دکاندار کے خلاف اقدام قتل کا مقدمہ درج کرنے کے بعد ملزم کی تلاش شروع کر دی۔