بھارت کی وزارتِ داخلہ نے گلوکار سدھو موسے والا کو قتل کرنے کی ذمہ داری قبول کرنے والے گینگسٹر ستوندر سنگھ عرف گولڈی برار کو تخریب کار قرار دے دیا ۔وزارتِ داخلہ نے گولڈی برار کو غیر قانونی سرگرمیوں کی روک تھام کے قانون کے تحت تخریب کار قرار دیا۔رپورٹ کے مطابق گولڈی برار کینیڈا میں موجود ہیں اور وہ ببر خالصہ نامی کالعدم تخریب کار گرد گروپ کے رکن ہیں۔ ببر خالصہ انٹرنیشنل گروپ تخریب کار تنظیموں کی فہرست میں موجود ہے۔ 29 مئی 2022 کو بھارت کے معروف پنجابی گلوکار سدھو موسے والا کو قتل کردیا گیا تھا۔ اس قتل کی ذمہ داری کینیڈا میں رہنے والے گینگسٹر گولڈی برار نے قبول کی تھی۔وزارتِ داخلہ کی جانب سے جاری کردہ نوٹی فکیشن کے مطابق گولڈی برار کو قوم پرست رہنماؤں کو دھمکی آمیز کال کرنے اور بنیاد پرست نظریات کا دعویٰ کرنے پر تخریب کار قرار دیا گیا۔وزارت داخلہ کے مطابق گولڈی برار سرحد بار سے ڈرونز کے ذریعے جدید اسلحہ، گولہ بارود اور دھماکہ خیز مواد کی اسمگلنگ سمیت قتل کرنے اور نشانہ باز فراہم کرنے میں بھی ملوث ہیں۔