بیجنگ:چین کے وزیر خارجہ وانگ یی نے سعودی عرب، اردن، مصر، فلسطینی نیشنل اتھارٹی اور انڈونیشیا کے ہم منصبوں کے ساتھ ساتھ اسلامی تعاون تنظیم کے سربراہ کا چینی دارالحکومت کے دو روزہ دورے پر خیرمقدم کیا۔سعودی عرب کے وزیر خارجہ شہزادہ فیصل بن فرحان کے ساتھ دورے پر آئے وزراء نے تنازعے کے خاتمے کے لیے اپنے اپنے مطالبات کا اظہار کیا اور کہا کہ پیغام واضح ہے، جنگ کو فوری طور پر روکنا چاہیے۔سعودی عرب اور دیگر اسلامی ممالک کے وزرا کے وفد نے پیر کے روز چین کے دارالحکومت بیجنگ کا دورہ کیا جہاں وزرا کی اہم بیٹھک لگی،جسے غزہ میں اسرائیلی جارحیت رکوانے اور علاقے میں انسانی امداد کی بحالی کے لیے دوروں کا پہلا قدم قرار دیا گیا ہے، اس دوران وزرا نے غزہ میں فوری طور پر جنگ بندی کا مطالبہ کیا۔ وزرا کے وفد کی اقوام متحدہ کی سلامتی کونسل کی مستقل رکنیت رکھنے والے ممالک کے عہدیداروں سے بھی ملاقات ہوگی جس میں مغرب پر یہ زور دیا جائے گا کہ وہ اسرائیل کے اس مؤقف کو مسترد کرے کہ وہ غزہ میں اپنے حق دفاع میں حملے کررہا ہے۔چین کے اعلیٰ ترین سفارت کار سے ملنے والوں میں سعودی عرب، اردن، مصر، انڈونیشیا اور فلسطین کے وزرا سمیت او آئی سی کے اور دیگر حکام شامل تھے۔سعودی عرب غزہ میں اسرائیلی جارحیت رکوانے کے لیے امریکا اور اسرائیل پر دباؤ بڑھانے کی کوشش کررہا ہے۔