جاپانی حکومت نے وزارتِ تعلیم، ثقافت، کھیل، سائنس و ٹیکنالوجی (MEXT) کے تحت 2027 کے لیے اسکالرشپ پروگرام کا اعلان کیا ہے، جس کے تحت بین الاقوامی طلبہ کو ماسٹرز، پی ایچ ڈی اور ریسرچ پروگرامز میں مکمل مالی معاونت کے ساتھ تعلیم حاصل کرنے کا موقع فراہم کیا جائے گا۔
یہ پروگرام ایسے طلبہ کے لیے ہے جو تحقیقاتی تعلیم کے ذریعے عالمی علمی ترقی میں حصہ ڈالنا چاہتے ہیں اور جاپان اور اپنے ممالک کے درمیان تعلیمی و ثقافتی تعاون کو فروغ دینا چاہتے ہیں۔ پروگرام میں ریسرچ اسٹوڈنٹس، ماسٹرز اور ڈاکٹریٹ سطح کے طلبہ شامل ہوں گے، جبکہ بعض مخصوص فنی اور ووکیشنل شعبے اس میں شامل نہیں ہیں۔ اہلیت کے مطابق درخواست دہندگان کو متعلقہ تعلیمی معیار پورا کرنا ہوگا اور اپنے سابقہ شعبہ تعلیم یا تجربے سے متعلق تحقیق کا انتخاب کرنا ہوگا۔ جاپانی زبان سیکھنے اور ملک میں رہائش اختیار کرنے کی صلاحیت بھی لازمی شرائط میں شامل ہے۔ اسکالرشپ کے تحت ماہانہ وظیفہ، مکمل ٹیوشن فیس معافی، داخلہ فیس کی چھوٹ اور جاپان آنے اور واپس جانے کے لیے ایئر ٹکٹ سمیت تمام بنیادی اخراجات فراہم کیے جائیں گے۔ پروگرام کی مدت ماسٹرز اور پی ایچ ڈی کی نوعیت کے مطابق مختلف ہوگی، جبکہ بعض طلبہ کو ابتدائی جاپانی زبان کی تربیت بھی دی جائے گی۔ انتظامیہ کے مطابق درخواست دہندگان سے تعلیمی کارکردگی بہتر رکھنے، جاپان میں تعلیمی اور ثقافتی سرگرمیوں میں حصہ لینے اور پروگرام کے تمام قواعد کی پابندی کی توقع کی جاتی ہے۔ یہ اسکالرشپ دنیا کے سب سے باوقار تعلیمی مواقع میں شمار ہوتا ہے جو طلبہ کو عالمی معیار کی تحقیق اور تعلیمی ماحول فراہم کرتا ہے۔