آسٹریلیا کی میکوری یونیورسٹی نے دو ہزار چھبیس میں ماسٹر آف ریسرچ پروگرام کے لیے روڈ ٹو ریسرچ اسکالرشپ کا اعلان کر دیا ہے جس کے تحت مقامی اور بین الاقوامی طلبہ کو تحقیق کے میدان میں آگے بڑھنے کا موقع فراہم کیا جائے گا۔
اس اسکالرشپ کے تحت کامیاب طلبہ کو سالانہ انتالیس ہزار سات سو ڈالر تک مالی معاونت دی جائے گی تاکہ وہ اپنی تحقیق پر مکمل توجہ دے سکیں۔ یہ پروگرام خاص طور پر ان طلبہ کے لیے ہے جو جولائی دو ہزار چھبیس میں سڈنی میں مکمل وقت کے ساتھ ماسٹر آف ریسرچ پروگرام شروع کرنا چاہتے ہیں۔یونیورسٹی کے مطابق درخواست دینے والے امیدواروں کے لیے ضروری ہے کہ وہ آسٹریلیا میں موجود ہوں، سڈنی میں رہائش اختیار کریں اور ماسٹر آف ریسرچ پروگرام میں مکمل وقت کے ساتھ داخلہ لیں۔ امیدواروں کے پاس انگریزی زبان کی مطلوبہ مہارت اور کسی یونیورسٹی محقق کی نگرانی کی منظوری بھی ہونی چاہیے۔حکام کے مطابق اسکالرشپ کے لیے درخواستیں آن لائن جمع کرائی جا سکتی ہیں جبکہ درخواست جمع کرانے کی آخری تاریخ تیس اپریل دو ہزار چھبیس مقرر کی گئی ہے۔ یونیورسٹی کا کہنا ہے کہ اس پروگرام کے ذریعے طلبہ کو تحقیق کی عملی تربیت اور مستقبل میں پی ایچ ڈی کی تعلیم کے لیے مضبوط بنیاد فراہم کی جائے گی۔