ہیمپسٹیڈ سپروائزر کے امیدوار جو شنابلو کا مسلم کمیونٹی سے رابطہ، اشرف اعظمی کی اپیل

امریکی ریاست نیویارک کے ٹاؤن آف ہیمپسٹیڈ کے سپروائزر کے امیدوار جو شنابلو نے مسلم کمیونٹی کے مسائل، نمائندگی اور مقامی حکومت میں ان کی شمولیت کو یقینی بنانے کے عزم کا اظہار کیا ہے۔

اپنے پیغام میں جو شنابلو نے کہا کہ انہوں نے ٹاؤن کی مسلم کمیونٹی کے ارکان سے ملاقاتوں اور گفتگو کے دوران ان کے خدشات سنے ہیں۔ ان کے مطابق، مقامی ٹاؤن بورڈ کے اجلاسوں میں بھی انہوں نے دیکھا کہ کمیونٹی کے بعض ارکان کو نظرانداز کیا جاتا ہے۔جو شنابلو کا کہنا تھا کہ وہ اسلاموفوبیا سمیت ہر قسم کی نفرت کے خلاف آواز اٹھائیں گے، تاہم حقیقی نمائندگی کا مطلب صرف نفرت کی مذمت کرنا نہیں، بلکہ کمیونٹی کے مسائل سننا، ان کے حل کے لیے مل کر کام کرنا اور مقامی حکومت میں انہیں مناسب نمائندگی دینا بھی ہے۔انہوں نے پاکستانی اور وسیع تر مسلم کمیونٹی کی حمایت، چھوٹے کاروباروں کے فروغ اور ایسی معیشت کی تشکیل کے لیے کام کرنے کا عزم ظاہر کیا جس کے ثمرات تمام شہریوں تک پہنچ سکیں۔ ان کا کہنا تھا کہ ہر کمیونٹی کو عزت، ہر آواز کو اہمیت اور ہر شہری کو ترقی کے یکساں مواقع ملنے چاہییں۔دوسری جانب پاکستانی امریکن کمیونٹی کے رہنما اشرف اعظمی نے کمیونٹی کے ارکان سے اپیل کی ہے کہ وہ جو شنابلو کا پیغام اپنے دوستوں اور ٹاؤن آف ہیمپسٹیڈ میں مقیم کمیونٹی کے دیگر افراد تک پہنچائیں۔اشرف اعظمی کے مطابق، جو شنابلو کی انتخابی مہم کو تقویت مل رہی ہے اور ان کے انتخاب جیتنے کے امکانات اچھے دکھائی دے رہے ہیں۔ انہوں نے کہا کہ پاکستانی امریکن کمیونٹی کے ان کے ساتھ اچھے روابط ہیں۔