امریکہ میں کورونا وبا کے دوران اہم سرکاری ریکارڈ چھپانے کے الزام میں ایک سینئر عہدیدار کے خلاف مقدمہ درج کر لیا گیا ہے۔
استغاثہ کے مطابق ڈیوڈ ایم مورینس جو کہ نیشنل انسٹیٹیوٹ آف الرجی اینڈ انفیکشس ڈیزیزز میں سینئر مشیر رہ چکے ہیں، پر الزام ہے کہ انہوں نے کورونا تحقیق سے متعلق معلومات جان بوجھ کر چھپائیں اور سرکاری قوانین کی خلاف ورزی کی۔حکام کا کہنا ہے کہ ملزم نے دیگر افراد کے ساتھ مل کر معلومات تک رسائی کے قانون سے بچنے کے لیے سرکاری ای میل کے بجائے ذاتی ای میل استعمال کی، تاکہ حساس گفتگو عوامی نظروں سے اوجھل رکھی جا سکے۔ یہ اقدام خاص طور پر اس وقت کیا گیا جب کورونا وائرس کے پھیلاؤ کی وجوہات پر عالمی سطح پر بحث جاری تھی۔مزید یہ بھی الزام ہے کہ ملزم نے نہ صرف ریکارڈ میں رد و بدل کیا بلکہ بعض سائنسی مؤقف کو دبانے کی کوشش بھی کی، جبکہ بدلے میں انہیں غیر قانونی فوائد، تحائف اور مہنگی دعوتوں کی پیشکش کی گئی۔اگر عدالت میں الزامات ثابت ہو جاتے ہیں تو ملزم کو کئی برس قید کی سزا کا سامنا کرنا پڑ سکتا ہے، جبکہ تفتیش میں فیڈرل بیورو آف انویسٹی گیشن اور محکمہ صحت و انسانی خدمات کا دفتر برائے انسپکٹر جنرل شامل ہیں۔