امریکی صدر ڈونلڈ ٹرمپ اور اسرائیلی وزیراعظم نیتن یاہو غزہ جنگ ختم کرنے پر متفق ہو گئے ہیں۔
میڈیا رپورٹس کے مطابق صدر ڈونلڈ ٹرمپ اور اسرائیلی وزیراعظم بنیامین نیتن یاہو نے غزہ میں جاری جنگ کو دو ہفتوں کے اندر ختم کرنے پر اتفاق کر لیا ہے۔ رپورٹ میں دعویٰ کیا گیا ہے کہ غزہ میں حماس کی حکومت کے خاتمے کے بعد متحدہ عرب امارات، مصر اور دو دیگر عرب ممالک مشترکہ طور پر غزہ کا نظم و نسق سنبھالیں گے جبکہ حماس کی قیادت کو جلا وطن کر دیا جائے گا اور تمام یرغمالیوں کی رہائی عمل میں آئے گی۔ یہ فیصلہ حالیہ امریکی حملے کے بعد دونوں رہنماؤں کے درمیان ٹیلیفونک رابطے میں کیا گیا، جس کی تفصیلات اسرائیلی اخبار ”اسرائیل حیوم“ نے شائع کی ہیں۔ رپورٹ کے مطابق سعودی عرب اور شام اسرائیل کے ساتھ سفارتی تعلقات قائم کریں گے، دیگر عرب اور مسلمان ملک بھی ایسا ہی کریں گے۔ سعودی عرب شام کے سفارتی تعلقات کے جواب میں اسرائیل دو ریاستی حل کی حمایت کرے گا، دو ریاستی حل کی اسرائیلی حمایت کے لیے فلسطینی اتھارٹی کی اصلاحات کی شرط رکھی گئی ہے۔ امریکا کی جانب سے مغربی کنارے کے کچھ حصوں پر اسرائیلی خودمختاری کو تسلیم کیا جائے گا۔