نیوجرسی(ویب ڈیسک) نیوجرسی کے ڈیموکریٹک سینیٹر کوری بکر نے امریکی سینیٹ میں 25 گھنٹے 4 منٹ تک طویل خطاب کر کے ریکارڈ قائم کر دیا، جس کا مقصد صدر ڈونلڈ ٹرمپ کی انتظامیہ کے اقدامات کے خلاف احتجاج کرنا تھا۔ا
حکام کے مطابق، 55 سالہ سینیٹر کوری بکر نے پیر کی شام تقریر شروع کی تھی اور کہا کہ جب تک ہمت ہے تقریر جاری رکھوں گا۔ انہوں نے سینیٹ میں صحت کی دیکھ بھال، سوشل سیکیورٹی اور میڈیکیڈ جیسے اہم مسائل پر گفتگو کی اور ٹرمپ کے اقدامات کو سخت تنقید کا نشانہ بنایا۔ امریکی رپورٹس کے مطابق انہوں نے خطاب کے دوران یہ بھی کہا کہ عوام کی طاقت حکمرانوں کی طاقت سے زیادہ ہوتی ہے۔ انہوں نے اپنے خطاب میں کہا کہ میں آج یہاں اس لیے موجود ہوں کیونکہ میں سمجھتا ہوں کہ ہمارا ملک ایک بحران سے گزر رہا ہے۔ یہ امریکا کے لیے معمول کے دن نہیں ہیں اور انہیں معمول نہیں سمجھا جانا چاہیے۔ انہوں نے ٹرمپ پر اختیارات میں حد سے زیادہ اضافے کا الزام بھی لگایا اور کہا کہ امریکی جمہوریت کو خطرے میں ڈال دیا گیا ہے۔