واشنگٹن(ویب ڈیسک) ٹیسلا کے سی ای او ایلون مسک کی دولت میں 2025 کے صرف چند ہفتوں میں ہی 132 ارب ڈالرز کی کمی دیکھی گئی۔
حکام کے مطابق، ایلون مسک کے لیے 2025 کا سال مالی لحاظ سے کچھ زیادہ اچھے ثابت نہیں ہوا ان کی دولت میں چند ہفتوں میں ہی 132 ارب ڈالرز کی کمی آچکی ہے۔ درحقیقت 10 مارچ کو ہی ایلون مسک کو 29 ارب ڈالرز کا نقصان برداشت کرنا پڑا ہے اور ان کی مجموعی دولت اب 301 ارب ڈالرز تک گھٹ گئی ہے۔ ایلون مسک نے سال کا آغاز 433 ارب ڈالرز کے ساتھ کیا تھا اور بظاہر امریکی حکومت کے لیے ان کی جانب سے تجویز کردہ مالی بچت کے اقدامات ان کی اپنی کمپنیوں کے لیے کچھ زیادہ اچھے ثابت نہیں ہو رہے۔ دسمبر 2024 میں ان کی دولت 486 ارب ڈالرز کی ریکارڈ سطح تک پہنچی تھی۔جبکہ 10 مارچ کو ایلون مسک کی کمپنی ٹیسلا کے حصص کی قیمتوں میں 15 فیصد کمی آئی جس کے نتیجے میں ایلون مسک کو 29 ارب ڈالرز سے محروم ہونا پڑا۔ ایلون مسک ٹیسلا کے 21 فیصد حصص کے مالک ہیں اور ان کی مجموعی دولت کا 68 فیصد حصہ بھی اسی کمپنی کے حصص سے منسلک ہے۔ ویسے 3 ماہ میں 132 ارب ڈالرز کی کمی کے باوجود ایلون مسک تاحال دنیا کے امیر ترین شخص ہیں۔