واشنگٹن(ویب ڈیسک) امریکا میں ماہ دسمبر سے اب تک کرپٹو مارکیٹس میں تقریباً ایک کھرب ڈالر کا نقصان ریکارڈ ہوا ہے جبکہ قیمتوں میں مزید کمی کی توقع ہے۔
ماہرین کا کہنا ہے کہ مارکیٹ اس وقت تک سست رہے گی جب تک فیڈرل ریزرو کی جانب سے شرح سود میں کمی یا ٹرمپ کی طرف سے کرپٹو کے حق میں کوئی واضح ریگولیٹری پالیسی نہ آئے۔ بٹ کوائن جنوری کی بلند سطح سے 21 فیصد نیچے آ چکا ہے، جبکہ ایتھر کی قیمت 40 فیصد تک گر چکی ہے۔ ٹرمپ کے کرپٹو کے حق میں اقدامات نے مارکیٹ پر زیادہ اثر نہیں ڈالا۔ انہوں نے کرپٹو کے ضوابط میں تبدیلی اور بٹ کوائن کے قومی ذخیرے کا وعدہ کیا تھا، لیکن ان فیصلوں سے سرمایہ کاروں کی توقعات پر کوئی خاص اثر نہیں پڑا۔ اس دوران ٹرمپ کی میم کرنسی 80 فیصد تک گر چکی ہے۔ امریکی صدر نے اپنی انتخابی مہم کے دوران کرپٹو کے حق میں کئی اقدامات کا وعدہ کیا تھا، اور خود کو کرپٹو صدر کہنے کا دعویٰ کیا تھا۔ انہوں نے قومی بٹ کوائن ذخیرہ قائم کرنے اور کرپٹو کے ضوابط میں تبدیلی کے ساتھ ساتھ اپنے انتظامیہ میں کرپٹو کے حامی ہاورڈ لوٹک اور ڈیوڈ ساکس کو اہم عہدوں پر نامزد کرنے کا بھی وعدہ کیا تھا۔ لیکن ان اقدامات کا کرپٹو قیمتوں پر کوئی خاص اثر نہیں پڑا، اور بعض صنعت کے تجزیہ کاروں کا کہنا ہے کہ ٹرمپ سے کرپٹو کے حوالے سے امیدیں شاید بہت بلند تھیں۔