نیویارک(ویب ڈیسک) نیویارک سٹی کے مئیر ایرک ایڈمز نے حالیہ صدارتی انتخاب کے بعد میڈیا بریفنگ میں نئے سیاسی حالات پر تبصرہ کیا اور ڈونلڈ ٹرمپ کو مبارکباد پیش کی۔
مئیر ایڈمز نے بریفنگ میں اسقاط حمل اور امیگریشن جیسے اہم مسائل پر بھی اپنے خیالات کا اظہار کیا۔ مئیر نے کہا کہ نیویارک سٹی خواتین کے حقوق کے تحفظ کے لیے پرعزم ہے اور توقع رکھتے ہیں کہ وفاقی حکومت بھی انسانی بنیادوں پر ایک متوازن پالیسی اپنائے گی۔ایڈمز نے مزید کہا کہ نیویارک سٹی مستقبل میں وفاقی پالیسی تبدیلیوں کا بغور جائزہ لے گا اور ایسی حکمت عملی اختیار کرے گا جس سے شہر کی معیشت، انفراسٹرکچر، اور سماجی خدمات پر مثبت اثرات مرتب ہوں۔ انہوں نے امید ظاہر کی کہ وفاقی حکومت کے ساتھ مضبوط تعلقات نیویارک کو مزید فنڈنگ اور وسائل فراہم کریں گے، جس سے ترقیاتی منصوبوں کو تقویت ملے گی۔ایڈمز نے اپنی ترجیح نیویارک کے عوام کے مفادات کا تحفظ بتاتے ہوئے کہا کہ وہ وفاقی حکومت کے ساتھ مل کر عوام کے بہتر مستقبل کے لیے فیصلے کرنے کے لیے پرعزم ہیں۔ انہوں نے اس بات کا اعادہ کیا کہ شہری انتظامیہ ملک کی سیاسی تبدیلیوں کا خیر مقدم کرتے ہوئے شہریوں کی فلاح و بہبود کے لیے اقدامات جاری رکھے گی۔