سعودی عرب میں ادبی تنظیم حلقہ فکروفن کی تنظیم سازی کے حوالے سے خصوصی اجلاس

ریاض(نمائندہ خصوصی)سعودی عرب میں ادبی تنظیم حلقہ فکروفن کی تنظیم سازی کے حوالے سے خصوصی اجلاس منعقد کیا گیا جس میں نئی ایگزیکٹو کمیٹی کا اعلان کیا گیا جبکہ ادبی نشست میں شعراء کرام نے اپنا کلام سنا کر بھی خوب داد وصول کی۔دارالحکومت ریاض میں حلقہ فکروفن کی نئی ایگزیکٹو کمیٹی میں چیئرمین ڈاکٹر ریاض چوہدری اور وائس چیرمین کے لیے عدنان اقبال بٹ کو منتخب کیا گیا۔معروف شاعر وقار نسیم وامق کو صدر جبکہ ڈاکٹر طارق عزیز اور کامران حسانی کو جنرل سیکرٹری اور ڈپٹی جنرل سیکرٹری کے طور پر منتخب گیا اسی طرح ایگزیکٹو کمیٹی کے دیگر عہدیداروں کا بھی اعلان کیا گیا جن میں قاضی اسحاق میمن، مخدوم امین تاجر،چوہدری سجاد علی، ظفر اقبال، زکیر احمد بھٹی، سید طیب رضا ، شیخ ارشد اور دیگر شامل ہیں۔ اس موقعہ پر حلقہ فکروفن کے نئے عہدیداروں کا کہنا تھا کہ ادب کے فروغ کے لیے حلقہ فکروفن گزشتہ بیالیس سالوں سے سعودی عرب میں اپنی خدمات سرانجام دیتی آ رہی ہے جس نے ادب سے لگاو رکھنے والوں کے لیے ہمیشہ عالمی مشاعروں کا انعقاد بھی کیا ہے اور مقامی محافل کو بھی سجایا ہے تاکہ اردو ادب کو فروغ حاصل ہوسکے اس موقعہ پر نامور شعراء کرام طیب رضا، کامران حسانی، قلب عباس اور دیگر نے اپنا کلام بھی پڑھ کر سنایا اور شرکاء سے خوب داد بھی سمیٹی۔۔