پاکستان کے صوبہ بلوچستان کے تین مختلف مقامات پر دھماکے اور فائرنگ کے واقعات پیش آئے ہیں جن میں ایک شخص جاں بحق اور 5 افراد زخمی ہو گئے۔ دارالحکومت کوئٹہ میں سی پیک روڈ پر سڑک کنارے بم دھماکا ہوا، جس میں ایک شخص جاں بحق ہو گیا۔ دھماکے کے بعد پولیس نے علاقے کو گھیرے میں لے کر تفتیش شروع کردی۔ دھماکے میں جاں بحق شخص راہ گیر بتایا جارہا ہے۔ ایس ایس پی آپریشنز جواد طارق کے مطابق دھماکے میں 8 سے 10 کلو دھماکا خیز مواد استعمال کیا گیا۔ جاں بحق شخص کی شناخت کے حوالے سے تحقیقات جاری ہیں۔جائے دھماکے کی حدود میں کوئی انتخابی پروگرام نہیں تھا، شہر میں انتخابی گہما گہمی کے حوالے سے سیکیورٹی ہائی الرٹ ہے۔ دوسری جانب جعفرآباد کے علاقے ڈیرہ اللہ یار میں قومی شاہراہ پر ہوٹل کے قریب دستی بم حملہ ہوا ہے، جس میں 4 افراد زخمی ہو گئے۔ پولیس کا کہنا ہے حملہ ایک ٹرک کے قریب ہوا۔ تیسرا واقعہ تربت شہر میں پیش آیا، جہاں غلام نبی چوک پر دھماکا ہوا اور فائرنگ کی گئی، جس میں ایک شخص زخمی ہو ا۔ ادھر الیکشن کمیشن نے کوئٹہ، تربت اور جعفر آباد میں ہونے والے دھماکوں کا نوٹس لیتے ہوئے چیف سیکریٹری اور آئی جی بلوچستان سے فوری رپورٹ طلب کر لی ہے۔