نیویارک کے علاقے بروکلین میں تاریخی ساؤتھ بش وِک ریفارمڈ چرچ میں بھیانک آگ لگ گئی جس نے چند ہی منٹوں میں پوری عمارت کو اپنی لپیٹ میں لے لیا اور تاریخی مینار زمین بوس ہو گیا۔
فائر ڈیپارٹمنٹ نیویارک کے مطابق آگ دوپہر ڈیڑھ بجے سے کچھ قبل 855 بش وِک ایونیو پر لگی اور چند ہی منٹوں میں سیکنڈ الارم اور پھر 20 منٹ کے اندر تھرڈ الارم کی صورت اختیار کر گئی۔ 63 یونٹس اور تقریباً 200 فائر اور ایمرجنسی اہلکار موقع پر موجود رہے۔ آگ لگنے کے تقریباً 15 منٹ بعد ویڈیو فوٹیج میں تاریخی مینار کو گرتے ہوئے دیکھا گیا۔ آگ ریکٹری اور ملحقہ عمارت تک بھی پھیل گئی تاہم خوش قسمتی سے صرف ایک فائر فائٹر کو معمولی چوٹ آئی۔ حکام کے مطابق عمارت کو اب منہدم کرنا پڑے گا جو 1982 سے نیشنل رجسٹر آف ہسٹاریک پلیسز میں شامل تھی۔ چرچ کے پادری جیمز اسٹیورٹ نے آبدیدہ ہوتے ہوئے کہا کہ 175 سال کی وزارت کا یہ نقصان جذباتی طور پر انتہائی تکلیف دہ ہے لیکن چرچ صرف عمارت نہیں بلکہ لوگ ہیں اور ہم مل کر اس مشکل سے نکلیں گے۔ ریاست کی اٹارنی جنرل لیٹیشیا جیمز نے اعلان کیا کہ چرچ کی تعمیرِ نو کے لیے سرکاری گرانٹس اور مالی معاونت فراہم کی جائے گی۔ آگ لگنے کی وجہ تاحال نامعلوم ہے اور فائر مارشلز تحقیقات کر رہے ہیں۔