نیویارک کے میئر زوہران ممدانی اور شہر کے محکمہ ٹرانسپورٹ نے موسمِ سرما کے بعد سڑکوں کی مرمت کے لیے بڑے پیمانے پر مہم شروع کرنے کا اعلان کیا ہے۔
اس مہم کے تحت ہفتے کی صبح چھ بجے سے شہر کے پانچوں علاقوں میں اسّی سے زائد ٹیمیں سڑکوں اور شاہراہوں پر گڑھے بھرنے کے لیے تعینات کی جائیں گی۔شہری حکام کے مطابق ایک ہی دن میں ہزاروں گڑھوں کی مرمت کی جائے گی جبکہ آنے والے ہفتوں میں بھی اسی طرح کی مزید کارروائیاں کی جائیں گی۔ حکام کا کہنا ہے کہ یکم جنوری سے اب تک شہر بھر میں پچاس ہزار سے زائد گڑھے بھرے جا چکے ہیں جبکہ صرف گزشتہ ہفتے میں ہی دس ہزار سے زیادہ گڑھوں کی مرمت کی گئی۔محکمہ ٹرانسپورٹ کے مطابق اس ماہ شہر میں سڑکوں کی مکمل ازسرِنو تعمیر اور ری سرفیسنگ کا سالانہ منصوبہ بھی شروع ہو رہا ہے جس کے تحت اس سال تقریباً ایک ہزار ایک سو پچاس لین میل سڑکوں کی نئی سطح بچھائی جائے گی۔ نیویارک ان چند شہروں میں شامل ہے جہاں شہر کا اپنا اسفالٹ پلانٹ موجود ہے جس سے مرمت کا کام تیزی سے مکمل کیا جا سکتا ہے۔حکام کے مطابق موسمِ بہار کے آغاز پر برف پگھلنے اور نمی کے باعث سڑکوں پر گڑھے زیادہ بنتے ہیں، اس لیے شہریوں سے کہا گیا ہے کہ وہ سڑکوں میں موجود گڑھوں کی اطلاع 311 سروس کے ذریعے دیں تاکہ فوری مرمت کی جا سکے۔