جنگلاتی آگ کے بڑھتے ہوئے دھوئیں کے باعث ماہرینِ صحت نے شہریوں کو گھروں کے اندر کی فضا صاف رکھنے کے لیے احتیاطی تدابیر اختیار کرنے کا مشورہ دیا ہے، کیونکہ دھوئیں میں موجود باریک ذرات سانس اور دل کی بیماریوں سمیت متعدد صحت کے مسائل پیدا کر سکتے ہیں۔
ماہرین کے مطابق اگر گھر میں سینٹرل ایئر کنڈیشننگ موجود ہو تو اس کے فلٹرز بروقت تبدیل کیے جائیں اور MERV-13 یا اس سے بہتر فلٹر استعمال کیے جائیں۔ اگر ممکن ہو تو اے سی کو ری سرکولیشن موڈ پر چلایا جائے تاکہ باہر کی آلودہ ہوا اندر داخل نہ ہو۔اگر ایئر پیوریفائر دستیاب نہ ہو تو ماہرین نے باکس فین اور فلٹرز سے تیار کردہ سادہ گھریلو ایئر فلٹر کو بھی مؤثر قرار دیا ہے، جو فضا میں موجود باریک آلودہ ذرات کو کم کرنے میں مدد دیتا ہے۔ماہرین نے شہریوں کو مشورہ دیا ہے کہ دھوئیں کے دوران کھڑکیاں اور دروازے بند رکھیں، غیر ضروری طور پر باہر نہ نکلیں، موم بتیاں یا ایسی اشیا استعمال نہ کریں جن سے گھر کے اندر مزید دھواں پیدا ہو، جبکہ سانس لینے میں دشواری، سینے میں درد یا شدید تکلیف کی صورت میں فوری طبی امداد حاصل کریں۔