امریکا کے محکمہ انصاف نے ریاست فلوریڈا میں ٹیکس ریٹرن تیار کرنے والے ایک گروہ کے خلاف عدالت سے رجوع کر لیا ہے اور مطالبہ کیا ہے کہ انہیں فوری طور پر روکا جائے۔
حکام کے مطابق یہ کارروائی ڈیٹونا بیچ اور اوکالا میں کام کرنے والے افراد اور ان کی کمپنی کے خلاف کی گئی ہے۔عدالتی دستاویزات میں الزام عائد کیا گیا ہے کہ ملزمان اپنے صارفین کے لیے جعلی اور گمراہ کن ٹیکس ریٹرن تیار کرتے تھے، جن میں غلط کٹوتیاں اور جعلی ٹیکس کریڈٹس شامل کیے جاتے تھے۔ اس طریقہ کار کے ذریعے وہ جان بوجھ کر قابلِ ادائیگی ٹیکس کو کم ظاہر کرتے اور ایسے ریفنڈز حاصل کرتے تھے جن کے وہ حقدار نہیں تھے۔حکام کے مطابق ان افراد نے فائلنگ اسٹیٹس میں غلط بیانی، کاروباری اخراجات اور نقصانات کو بڑھا چڑھا کر ظاہر کرنے کے ساتھ ساتھ ایندھن، تعلیم اور دیگر مدات میں جعلی کریڈٹس بھی شامل کیے۔ اس کے علاوہ انہوں نے کم آمدنی والے افراد کے لیے مخصوص ٹیکس کریڈٹ کے قواعد پر بھی عمل نہیں کیا۔سرکاری اندازوں کے مطابق صرف 2023 اور 2024 کے دوران ان سرگرمیوں سے حکومت کو 70 لاکھ ڈالر سے زائد کا نقصان پہنچا۔ محکمہ انصاف کا کہنا ہے کہ ٹیکس دہندگان کو چاہیے کہ وہ ٹیکس ریٹرن تیار کرواتے وقت احتیاط کریں اور غیر قانونی طریقوں سے کام کرنے والے عناصر سے بچیں۔حکام نے واضح کیا ہے کہ گزشتہ ایک دہائی کے دوران ایسے سینکڑوں افراد کے خلاف کارروائیاں کی جا چکی ہیں، اور اس حوالے سے مزید سخت اقدامات جاری رہیں گے۔