واشنگٹن(ویب ڈیسک) امریکی صدر ڈونلڈ ٹرمپ نے کہا ہے کہ حوثیوں کے کسی بھی حملے کا ذمہ دار ایران ہوگا اور اسے سنگین نتائج کا سامنا کرنا پڑے گا۔
امریکی رپورٹ کے مطابق ٹرمپ نے کہا ہے کہ یمن کے حوثی باغیوں کے مستقبل میں کسی بھی حملے کا براہ راست ذمہ دار ایران ہوگا۔ ٹرمپ کی جانب سے یہ بیان اپنے سوشل میڈیا پلٹ فارم ٹروتھ سوشل میڈیا دیا گیا جس میں انہوں نے کہا کہ اب سے امریکہ حوثیوں کے کسی بھی حملے کو خود ایران کا حملہ تصور کرے گا۔ ایران حوثیوں کے اقدامات کا ذمہ دار ہوگا اور اسے سنگین نتائج کا سامنا کرنا پڑے گا۔ انہوں نے ہفتے کے روز یمن پر اپنی نئی مدت کے پہلے امریکی حملے کے بعد یہ بیان جاری کیا ہے جس میں 53 افراد جاں بحق اور 98 زخمی ہوئے۔ اس کے جواب میں حوثیوں نے امریکی طیارہ بردار بحری جہاز پر دو حملوں کا دعویٰ کیا اور یمن کے ان کے زیر کنٹرول علاقوں میں احتجاجی مظاہروں میں ہزاروں افراد نے شرکت کی۔ حکام کے مطابق فلسطینی پرچم لہراتے مظاہرین نے فلسطینیوں سے اظہار یکجہتی کیا، مظاہرین نے امریکا اور اسرائیل کے خلاف پلے کارڈ بھی اٹھائے رکھے تھے۔