واشنگٹن(ویب ڈیسک) تارکین وطن ہوشیار ہو جائیں، امریکی صدر ڈونلڈ ٹرمپ امریکا میں غیر قانونی تارکین وطن کیلئے نیا منصوبہ لےکر آگئے ہیں۔
امریکی رپورٹس کے مطابق ٹرمپ انتظامیہ نے غیر قانونی سرحدی نقل و حرکت پر قابو پانے کے لیے ایک وفاقی رجسٹری بنانے کا ارادہ کیا ہے، جس میں غیر قانونی تارکین وطن کو رجسٹریشن کے ساتھ فنگر پرنٹ جمع کروانے ہوں گے۔ امریکی محکمہ ہوم لینڈ سکیورٹی کے حکام کے بیان کے مطابق، 14 سال اور اس سے زائد عمر کے تمام غیر قانونی تارکین وطن کو اپنی رجسٹریشن کروانی ہوگی۔ امریکی اخبار کی رپورٹ کے مطابق رجسٹری تارکین وطن کو اپنی ذاتی معلومات جمع کروانے یا جرمانے اور قید کی سزا کے لیے ہوگی۔ اقتدار سنبھالتے ہی ٹرمپ نے غیر قانونی امیگریشن کو قومی ایمرجنسی قرار دیتے ہوئے ایک وسیع کریک ڈاؤن نافذ کرنے کا اعلان کیا تھا جس کے بعد تارکین وطن کو امریکا بدر کرنے کا سلسلہ شروع ہوگیا۔