ڈیلس میں پاکستانی سیاسی رہنماؤں کااسٹینڈ ود پاکستان پلیٹ فارم تشکیل

امریکہ میں پاکستان کے خلاف پروپیگنڈے کا بھرپور جواب دینے کا عزم

ڈیلس(نمائندہ خصوصی)امریکی شہر ڈیلس میں اسٹینڈ وِد پاکستان کے زیر اہتمام پاکستان مخالف تنظیموں کے پروپیگنڈے اور منفی بیانیے کے خلاف 8 دسمبر کو ڈیلس ڈاؤن ٹاؤن کے کینڈی میوزیم کے سامنے احتجاجی مظاہرہ کیا جائے گا۔امریکی ریاست ٹیکساس کے شہر ڈیلس میں پاکستان کی دو بڑی سیاسی جماعتوں، پاکستان مسلم لیگ اور پاکستان پیپلز پارٹی، کے رہنماؤں سمیت دیگر ہم خیال جماعتوں کے نمائندوں نے ایک مشترکہ پلیٹ فارم اسٹینڈ وِد پاکستان تشکیل دیا ہے۔ اس پلیٹ فارم کا مقصد امریکی سیاست میں پاکستانی معاملات میں مداخلت، پاکستان مخالف تنظیموں کے پروپیگنڈے، اور ملک کے خلاف منفی بیانیے کا بھرپور جواب دینا ہے۔مشترکہ اجلاس میں طے پایا کہ اسٹینڈ وِد پاکستان کا بنیادی مقصد سیاسی تفریق سے بالاتر ہو کر پاکستان کے حق میں ایک مؤثر اور متحدہ آواز بلند کرنا ہے۔اس پلیٹ فارم کے تحت امریکی کانگریس اور سینیٹ کے ان اراکین کو حقائق سے آگاہ کیا جائے گا جو پاکستانی سیاست میں مداخلت کر رہے ہیں یا پاکستان کے حوالے سے غلط بیانی کا شکار ہیں۔اجلاس میں ساؤتھ ایشیا ڈیموکریسی واچ کے بورڈ ممبر سید فیاض حسن ،پاکستان مسلم لیگ آزاد کشمیر اورسیز کے صدر عابد ملک، پاکستان پیپلز پارٹی امریکہ کے سینئر نائب صدر امتیاز پیرزادہ، مسلم لیگ ٹیکساس کے صدر سبیل عباسی، ڈیلس پیس اینڈ جسٹس سینٹر کے صدر آفتاب صدیقی، نعیم چوہدری، عامر میمن ،افتخار درپن ، اشفاق چوہدری،اور محمد اے بھٹی  شریک تھے۔اجلاس میں فیصلہ کیا گیا کہ 8 دسمبر کو ڈیلس ڈاؤن ٹاؤن کے کینڈی میوزیم کے سامنے، گراسی نول پر شام 2 سے 4 بجے تک احتجاجی مظاہرہ کیا جائے گا۔ مظاہرے کا مقصد ان اراکین کانگریس اور سینیٹ کے خلاف آواز بلند کرنا ہے جو پاکستانی سیاست میں مداخلت کر رہے ہیں اور پاکستان کے حوالے سے منفی بیانیہ پیش کر رہے ہیں۔ رہنماؤں نے واضح کیا کہ اسٹینڈ وِد پاکستان کا مقصد نہ صرف امریکہ میں موجود پاکستانی کمیونٹی کو متحرک کرنا ہے بلکہ پاکستان کے خلاف جاری منفی پروپیگنڈے کا بھرپور اور مؤثر جواب دینا بھی ہے۔ اس پلیٹ فارم کے ذریعے مختلف ریاستوں میں محب وطن پاکستانیوں کو ایک منظم انداز میں متحرک کیا جائے گا تاکہ وہ پاکستان کے حق میں آواز اٹھا سکیں۔ پلیٹ فارم کے تحت یہ فیصلہ کیا گیا کہ امریکی کانگریس اور سینیٹ کی فارن ریلیشن کمیٹی کے اراکین کو خطوط ارسال کیے جائیں گے جن میں پاکستان کے حوالے سے حقائق پیش کیے جائیں گے۔ اس اقدام کے ذریعے نہ صرف اراکین کانگریس کو آگاہ کیا جائے گا بلکہ امریکی سیاست میں پاکستان کے مفادات کے تحفظ کو بھی یقینی بنایا جائے گا۔ اجلاس کے شرکاء نے عزم کیا کہ “اسٹینڈ وِد پاکستان” پلیٹ فارم ہر ممکن کوشش کرے گا کہ امریکہ میں پاکستان کے وقار اور مثبت تشخص کو فروغ دیا جائے۔ رہنماؤں نے اس بات پر زور دیا کہ یہ پلیٹ فارم پاکستان کے مفادات کی حفاظت اور اس کے خلاف جاری منفی بیانیے کے خاتمے کے لیے مؤثر کردار ادا کرے گا۔