منی کیمپ آفس، سعودی پاک وزراء ملاقات
پاکستان کے وزیر مذہبی امور چوہدری سالک حسین نے وفد کے ہمراہ سعودی ہم منصب ڈاکٹر توفیق بن فوزان الربیعہ سے ملاقات کی ، وفد میں سیکرٹری مذہبی امور ذوالفقار حیدر، حافظ طاہر اشرفی، ڈی جی حج عبدالوہاب سومرو، ڈائریکٹر مکہ فہیم خان آفریدی بھی شامل ہیں۔پاکستان کے وزیر مذہبی امور چوہدری سالک حسین کا کہنا ہے کہ پاکستانی حجاج کی سہولت کیلئے سعودی وزیر حج کی خصوصی توجہ باعث مسرت ہے۔انہوں نے کہا کہ سعودی حکومت حج انتظامات میں ہر سال جدت اور نئی سہولیات متعارف کروا رہی ہے،سرکاری و نجی عازمین حج کیلئے سعودی مکاتب کی جانب سے بہترین سہولیات کے متمنی ہیں۔ملاقات میں سعودی وزیر حج و عمرہ نے یقین دلایا کہ منی عرفات میں پاکستان حج مشن کی تمام ضروریات کا خیال رکھا جائے گا اورپاکستان حج مشن کو ہر ممکن تعاون فراہم کیا جائے گا۔انہوں نے کہا کہ مشاعر مقدسہ میں بہتر سہولیات کو یقینی بنانے کیلئے نجی کمپنیوں کی حوصلہ افزائی کر رہے ہیں۔اگلے سال سرکاری و نجی حج سکیم کیلئے ون۔ونڈو کے ذریعے رابطہ استوار کریں گے۔