کریملن نے اپوزیشن رہنما کی بیوہ کے الزامات مسترد کردئیے
مشہور روسی اپوزیشن رہنما ایلکسی نوالنی کی بیوہ یولیا نوالنایا نے روس کے صدر ولادمیر پیوٹن پر اپنے شوہر کے قتل کا الزام عائد کردیا ۔ایلکسی نوالنی کی بیوہ یولیا نوالنایا کا کہنا تھا کہ 3 دن قبل ولادیمیر پیوٹن نے الیکسی نوالنی کو قتل کردیا۔ الیکسی 3 سال کی اذیت اور تشدد کے بعد جیل کالونی میں وفات پاگئے ۔ولادیمیر پیوٹن کے خلاف لڑائی میں ایک دہائی سے زیادہ عرصے تک الیکسی نوالنی کا ساتھ دینے والی ان کی اہلیہ نے اہنے شوہر کے کام کو جاری رکھنے کا بھی وعدہ کیا۔یولیا نوالنایا نے کہا کہ سب سے اہم چیز جو ہم ایلکسی نوالنی اور اپنے لیے کر سکتے ہیں وہ یہ ہے کہ ہم پہلے سے زیادہ شدت کے ساتھ اپنی لڑائی جاری رکھیں۔ ہمیں جنگ ، بدعنوانی، ناانصافی ، منصفانہ انتخابات، اظہار رائے کی آزادی اور اپنے ملک کو واپس لینے کے لیے اپنی جدو جہد میں ہر موقع سے فائدہ اٹھانے کی ضرورت ہے۔انہوں نے اپنے شوہر کے قاتلوں کو کیفر کردار تک پہنچانے کا بھی عزم کیا۔علاوہ ازیںکریملن نے گزشتہ ہفتے جیل میں مرنے والے اپوزیشن رہنما ایلکسی نوالنی کی بیوہ کے الزامات کو مسترد کرتے ہوئے بے بنیاد قرار دیا ہے۔خبر رساں ایجنسی اے ایف پی کے مطابق گزشتہ ہفتے ایلکسی نوالنی کی جیل میں طبیعت بگڑنے پر بے ہوش ہو گئے تھے اور پھر دنیا سے کوچ کر گئے تھے۔ان کے انتقال کے بعد نوالنی کی بیوہ یولیا نوالنایا نے کہا تھا کہ ان کے شوہر کی موت کے پیچھے روسی صدر ولادمیر پیوٹن کا ہاتھ ہے۔آن لائن لاکھوں صارفین کو مخاطب کرتے ہوئے 47سالہ نوالنایا نے ’ملک کی آزادی کی خاطر‘ اپنے شوہر کی جدوجہد جاری رکھنے کا عزم ظاہر کیا تھا۔کریملن کے ترجمان دمتری پیسکوو نے کہا کہ یہ روسی ریاست کے سربراہ پر گھٹیا اور بے بنیاد الزامات ہیں لیکن چونکہ یولیا نوالنایا ابھی چند روز قبل ہی بیوہ ہوئی ہیں تو میں ان کے بیان پر مزید تبصرہ نہیں کروں گا۔پیسکوو نے بین الاقوامی تحقیقات کا یورپی یونین کا مطالبہ مسترد کرتے ہوئے کہا کہ ہم اس طرح کے مطالبات کو ہرگز منظور نہیں کریں گے۔نوالنی کی موت کے بعد حالیہ دنوں میں تعزیتی تقاریب کے موقع پر روس میں ہزاروں افراد کو حراست میں لینے کے حوالے سے انہوں نے کہا کہ قانون نافذ کرنے والے ادارے قانون کے دائرے میں رہ کر ہی کام کررہے ہیں۔