جناح سندھ میڈیکل یونیورسٹی ایلومنائی ایسوسی ایشن آف نارتھ امریکہ نے پاکستان میں طبی اور تعلیمی منصوبوں کی معاونت کے عزم کے ساتھ شکاگو میں چار روزہ سالانہ اجتماع منعقد کیا۔
یکم سے 4 اکتوبر تک الینوائے کے ڈبل ٹری ہلٹن اوک بروک میں ہونے والے اجتماع کی صدارت ایسوسی ایشن کے صدر ڈاکٹر احمد علی نے کی، جبکہ ڈاکٹر راحت شیخ معاون انچارج تھے۔اجتماع میں جناح سندھ میڈیکل یونیورسٹی، سابق سندھ میڈیکل کالج، سے فارغ التحصیل ڈاکٹروں اور ان کے اہل خانہ نے شرکت کی۔ پروگرام میں سابق ہم جماعتوں کے ری یونین، تکنیکی پینل مباحثوں، پیشہ ورانہ و تعلیمی نشستوں، سماجی اور ثقافتی سرگرمیوں کے علاوہ شکاگو دریائے کروز اور سالانہ عشائیہ بھی شامل تھا۔تقریب میں مشاعرہ، براہ راست موسیقی اور ایوارڈز کی تقریب نے بھی شرکا کو محظوظ کیا، جبکہ ڈاکٹروں کے لیے آٹھ گھنٹے پر مشتمل مسلسل طبی تعلیم کا پروگرام بھی منعقد کیا گیا۔ڈاکٹر احمد علی کے مطابق ایسوسی ایشن کا مقصد پاکستانی طبی گریجویٹس کو شمالی امریکا کے طبی نظام سے ہم آہنگ ہونے، لائسنسنگ امتحانات کی تیاری، کیریئر رہنمائی اور ریزیڈنسی کے حصول میں معاونت فراہم کرنا ہے۔انہوں نے بتایا کہ ایسوسی ایشن جناح سندھ میڈیکل یونیورسٹی کراچی میں تعلیمی سہولیات کی بہتری، ہاسٹلز کی مرمت و بحالی، خواتین کے ہاسٹل میں شمسی توانائی کے نظام اور دیگر فلاحی و انسانی منصوبوں کے لیے بھی مالی و تکنیکی معاونت فراہم کرتی ہے۔چار روزہ اجتماع نے شمالی امریکا اور دیگر علاقوں سے تعلق رکھنے والے سابق طلبہ کو ایک دوسرے سے دوبارہ ملنے، نئے روابط قائم کرنے، تجربات کا تبادلہ کرنے اور جناح سندھ میڈیکل یونیورسٹی سے وابستہ دیرینہ تعلقات کو مزید مضبوط بنانے کا موقع فراہم کیا۔