نیویارک میں آئندہ تعلیمی سال کے لیے 3-کے اور پری-کے پروگرامز کے تحت 99 ہزار 921 بچوں کو داخلوں کی پیشکش کی گئی ہے، جسے شہر کی تاریخ میں ابتدائی تعلیم کے شعبے میں ایک بڑی پیش رفت قرار دیا جا رہا ہے۔
شہر کی انتظامیہ کے مطابق اس سال نہ صرف موجودہ نشستوں پر داخلے دیے گئے ہیں بلکہ مزید 2 ہزار نئی 3-کے نشستیں بھی شامل کی گئی ہیں تاکہ زیادہ سے زیادہ بچوں کو ان کے رہائشی علاقوں کے قریب تعلیم فراہم کی جا سکے۔ اس منصوبے کے بعد بچوں کا اسکول تک روزانہ کا سفر بھی اوسطاً کم ہوا ہے، جو والدین کے لیے ایک اہم سہولت ہے۔اعداد و شمار کے مطابق تقریباً 70 فیصد خاندانوں کو ان کی پہلی ترجیح کے مطابق پروگرام میں داخلہ ملا، جبکہ 84 فیصد خاندانوں کو ان کی پہلی تین ترجیحات میں سے کسی نہ کسی آپشن میں جگہ ملی۔ اس کے ساتھ ساتھ ایسے کیسز میں بھی نمایاں کمی دیکھی گئی ہے جہاں بچوں کو غیر مطلوبہ یا دور دراز مراکز میں بھیجنا پڑتا تھا۔میئر ممدانی نے اس پیش رفت کو ایک بڑی کامیابی قرار دیتے ہوئے کہا ہے کہ ہر بچے کو معیاری ابتدائی تعلیم تک برابر رسائی ملنی چاہیے۔