امریکا کے محکمہ انصاف نے ریاست الی نوائے کے 36 سرکاری اسکول اضلاع کے خلاف تحقیقات شروع کر دی ہیں، جن میں پری کے سے لے کر بارہویں جماعت تک کے نصاب میں جنسی رجحان اور جینڈر آئیڈیالوجی سے متعلق مواد شامل کرنے کا جائزہ لیا جائے گا۔
حکام کے مطابق یہ تحقیقات اس بات کا بھی جائزہ لیں گی کہ آیا اسکول انتظامیہ والدین کو اس حق سے آگاہ کرتی ہے یا نہیں کہ وہ اپنے بچوں کو ایسے اسباق سے الگ رکھ سکیں۔ اس کے ساتھ ساتھ یہ بھی دیکھا جائے گا کہ آیا اسکول بیت الخلا، لاکر رومز اور کھیلوں کی ٹیموں تک رسائی حیاتیاتی جنس کی بنیاد پر محدود کر رہے ہیں یا نہیں۔محکمہ انصاف کے سول رائٹس ڈویژن کی سربراہ ہرمیت کے دھلوں کا کہنا ہے کہ والدین کو اپنے بچوں کی تعلیم اور تربیت کے حوالے سے بنیادی اختیار حاصل ہے، اور انہیں نصاب کے ایسے حصوں سے اپنے بچوں کو الگ رکھنے کا حق ہونا چاہیے جو ان کی اقدار سے متصادم ہوں۔تحقیقات میں یہ بھی دیکھا جائے گا کہ آیا متعلقہ اسکول اضلاع ٹائٹل نائن جیسے وفاقی قوانین اور سپریم کورٹ کے فیصلوں پر عمل کر رہے ہیں یا نہیں۔ تاہم حکام نے واضح کیا ہے کہ فی الحال کسی حتمی نتیجے پر نہیں پہنچا گیا۔