امریکی وفاقی حکام نے ریاست الینوائے سے تعلق رکھنے والے دو افراد کو گرفتار کر لیا جن پر الزام ہے کہ انہوں نے میڈیکیئر سے 227 ملین ڈالر کی رقم وصول کرنے کے لیے جعلی بل اور رسیدیں استعمال کیں۔
امریکی محکمہ انصاف کے جاری کردہ پریس ریلیز کے مطابق، الینوائے کے شہر شکاگو سے تعلق رکھنے والے سید مرتضیٰ قبلزادہ اور سید مہدی حسین نے جعلی لیبارٹریوں کے ذریعے اوور دی کاؤنٹر کورونا ٹیسٹ کٹس کے جھوٹے دعوے جمع کرائے تھے۔محکمہ انصاف کے کرمنل ڈویژن کے سربراہ میتھیو آر گیلیوٹی کے مطابق ملزمان نے متعدد لیبارٹریوں کے لیےفرضی مالکان کے نام استعمال کیے اور کورنا ٹیسٹ کٹس کے لیے میڈیکئر کو 200 ملین ڈالر کی ادائیگی کے لیے جعلی درخواستیں جمع کروائیں ۔وفاقی حکام کے مطابق ملزمان نے فرضی مریضوں کے نام پر جعلی بل جمع کروائے، جن میں ایسے افراد بھی شامل تھے جو کچھ عرصہ قبل وفات پا چکے تھے۔ میڈیکیئر نے 227 ملین ڈالرمیں سے 136 ملین ڈالر کی ادائیگیاں کیں۔ حکام کا کہنا ہے کہ ملزمان نے ایک مارکیٹنگ کمپنی کو بھی رقم دی تاکہ مریضوں کا ڈیٹا حاصل کیا جا سکے، جسے فراڈ میں استعمال کیا گیا۔ تحقیقات کے مطابق دونوں ملزمان پر ہیلتھ کیئر فراڈ کے چار الزامات عائد کیے گئے ہیں جن میں ہر الزام پر 10 سال تک قید کی سزا ہو سکتی ہے۔ محکمہ انصاف کے مطابق فراڈ سیکشن اور کرمنل ڈویژن نے مارچ2007 سے اب تک 5800 ملزمان کے خلاف کاروائی کیں جنھوں نے مجموعی طور پر وفاقی ہیلتھ کیئر پروگرامز اور انشورنش کمپنیوں کو 30 ارب ڈالرسے زائد کے بل بھیجے تھے ۔