برلن(نمائندہ خصوصی)جرمنی کے دارالحکومت برلن میں پاکستان پیپلز پارٹی برلن کے زیر اہتمام پارٹی کے بانی، شہید ذوالفقار علی بھٹو کی 97ویں سالگرہ کی تقریب منعقد ہوئی۔ یہ تقریب ضلع ویڈنگ کے معروف ریسٹورنٹ خان بابا میں منعقد کی گئی جس کا آغاز سینیئر نائب صدر منیر بیگ کی صدارت میں تلاوت کلام پاک سے ہوا، جسے ظہور احمد نے پیش کیا۔تقریب کے دوران شہید ذوالفقار علی بھٹو کی قوم کے لیے خدمات پر خراج عقیدت پیش کیا گیا اور پارٹی کارکنان نے تجدید عہد وفا کیا۔ اس موقع پر کیک کاٹا گیا اور پارٹی کے رہنماؤں نے اپنے خیالات کا اظہار کیا۔پیپلز پارٹی برلن کے جنرل سیکرٹری میاں اکمل لطیف نے کہا کہ شہید قائد عوام نے کچلے ہوئے طبقات کو طاقت دی اور عوام کو عزت و وقار سے جینے کا ڈھنگ سکھایا۔ انہوں نے کہا کہ ہم بھٹو کے نظریے پر ثابت قدم ہیں۔سینیئر نائب صدر منیر بیگ نے اپنے خطاب میں کہا کہ پاکستان میں جمہوریت بھٹو خاندان کی قربانیوں کا ثمر ہے۔ ذوالفقار علی بھٹو نے پاکستان کو متفقہ آئین دیا، نوے ہزار قیدیوں کو بھارت کی قید سے آزاد کرایا، اور پاکستان کو ایٹمی طاقت بنا کر ناقابل تسخیر بنایا۔پریس کلب کے چیئرمین اور سینیئر صحافی ظہور احمد نے کہا کہ ذوالفقار علی بھٹو نے عالم اسلام کو متحد کیا اور عرب ممالک کو ان کی تیل کی دولت کا احساس دلایا۔ ان کی انہی کاوشوں کی وجہ سے مغربی طاقتیں ان کی دشمن بنیں اور انہیں ایک آمر کے ذریعے موت کی سزا دلوائی۔پیپلز پارٹی برلن کے نائب صدر اور سوشل ایکٹوسٹ عابد حسین بلوچ نے کہا کہ بھٹو شہید کے نظریے پر کاربند رہنا ہمارا نصب العین ہے۔ انہوں نے کہا کہ بھٹو خاندان کی قربانیاں پاکستان میں جمہوریت کے لیے ہمیشہ یاد رکھی جائیں گی۔سابق سینیئر رہنما ملک ایوب اعوان نے کہا کہ ذوالفقار علی بھٹو نے ملک کی دوبارہ تعمیر کی اور ان کے ہر خواب کو پورا کرنے کے لیے پیپلز پارٹی آج بھی ڈٹی ہوئی ہے۔ اس موقع پر سابق کارکنان پی ایس ایف، یوتھ ونگ برلن کے رہنماؤں، علی جعفری، ناظم، ابوبکر، سردار جہانگیر، فاروق بخاری اور عارف سلیمی سمیت دیگر سینیئر رہنماؤں نے بھی تقریب میں شرکت کی۔تقریب کے اختتام پر پیپلز پارٹی کے شہداء کے لیے دعائے مغفرت کی گئی اور شرکاء کے اعزاز میں عشائیہ دیا گیا۔ 5 جنوری کو ذوالفقار علی بھٹو کی 97ویں سالگرہ کے موقع پر کیک کاٹ کر اس یادگار تقریب کا اختتام ہوا۔