ریاض(نمائندہ خصوصی)سعودی عرب میں متحدہ قومی موومنٹ کے سنئیر رہنما رکن قومی اسمبلی مصطفی کمال کے اعزاز میں تقریب کا اہتمام کیا گیا جس میں پاکستانی کمیونٹی کے افراد کی بڑی تعداد شریک تھی۔تقریب سے خطاب کرتے ہوئے مصطفی کمال کا کہنا تھا کہ پاکستان کے حالات کو بہتر بنانے کے لیے پوری قوم کو نیک نیتی کے ساتھ آگے بڑھنے کی ضرورت ہے۔سعودی دارالحکومت ریاض میں متحدہ قومی موومنٹ کے رہنماؤں شمشاد علی صدیقی،حنیف بابر کی جانب سے متحدہ قومی موومنٹ کے سنئیر رہنما رکن قومی اسمبلی مصطفی کمال کے اعزاز میں تقریب منعقد کی۔ جس میں سیاسی،سماجی،ادبی اور مذہبی جماعتوں کے اراکین کی بڑی تعداد موجود تھی۔ اس موقع پر اپنے خطاب میں مصطفی کمال کا کہنا تھا کہ پاکستان کے تمام ادارے بری طرح تباہ ہوچکے ہیں سیاسی اور جمہوری اقدار کے ساتھ ساتھ معاشرتی اخلاقیات بھی اپنا وجود کھو چکی ہیں اس لیے ضروری ہے کہ سیاست دانوں کے ساتھ ساتھ پوری قوم نیک نیتی کے ساتھ پاکستان کے بہتری کے لیے کام کرے اور پاکستان کو ہر قسم کی نفرت اور افراتفری سے نکال کر ترقی اور خوشحالی کی راہ پر گامزن کرے پاکستان ایک عظیم مملکت ہے جس کو فلاحی ریاست بنانے میں ہر مکاتب فکر کو اپنا کردار ادا کرنے کی ضرورت ہے۔ مصطفی کمال نے کراچی کے مسائل پر بھی گفتگو کی اور کہا کہ کراچی تین کروڑ آبادی کا شہر ہے جسکے دو کروڑ اسی لاکھ گھروں کو پانی کی سہولت میسر نہیں ہے ٹینکر مافیا کا راج ہے اور اسی طرح کراچی کے مکینوں کو بے شمار مسائل کا سامنا ہے اس لیے ضروری ہے کہ کراچی کی عوام کو بنیادی حقوق کی فراہمی کے علاوہ دیگر سہولیات سے آراستہ کیا جائے تقریب سے شمشاد احمد صدیقی ، حنیف بابر ،ڈاکٹر مجاہد قائمخانی اور دیگر نے بھی اظہار خیال کیا اور کہا کہ پاکستان سے باہر مقیم پاکستانی ملک و قوم کے لیے درد دل رکھتے ہیں اور وہ زرمبادلہ کے علاوہ ہر مشکل وقت میں وطن عزیز کی خدمت کا فریضہ بھی انجام دیتے ہیں