پاکستان کی قومی سلامتی کمیٹی کا ملکی سلامتی پر کسی قسم کا سمجھوتہ نہ کرنے کا عزم، نگران وزیر اعظم کی زیر صدارت قومی سلامتی کمیٹی کا اجلاس ہواشرکا نے ایرانی جارحیت کے جواب میں موثر کارروائی پر مسلح افواج کو خراج تحسین پیش کیا ، وفاقی کابینہ نے دونوں ممالک کے درمیان سفارتی تعلقات بحال کرنے کی منظوری دے دی۔نگران وزیراعطم انوار الحق کاکڑ نے قومی سلامتی اجلاس کی صدارت کی جس میں آرمی چیف جنرل سید عاصم منیر، چیئرمین جوائنٹ چیفس آف سٹاف کمیٹی جنرل ساحر شمشاد مرزا، ایئر اور نیول چیفس سمیت نگران وزیر خارجہ، خزانہ اور خفیہ اداروں کے اعلیٰ حکام نے شرکت کی۔اجلاس میں پاک ایران کشیدگی پر غور کیا گیا، نگران وزیر خارجہ جلیل عباس جیلانی نے سفارتی محاذ اور اعلیٰ عسکری حکام نے پاک ایران سرحدی صورتحال پر مفصل بریفنگ دی ،ذرائع کے مطابق اجلاس کے شرکا نے ایرانی جارحیت کے جواب میں موثر کارروائی پر مسلح افواج کو خراج تحسین پیش کیا، کمیٹی نے پاکستان کی سالمیت اور خود مختاری کا ہر قیمت پر تحفظ کرنے کا اعادہ کیا۔وزیر اعظم انوار الحق کاکڑ نے کہا کہ ہمارا جواب موثر اور اہداف کے حصول پر مبنی تھا، پاکستان ایک پُرامن ملک ہے، تمام ہمسائیوں سے امن کے ساتھ رہنا چاہتے ہیں۔دوسری جانب وفاقی کابینہ نے قومی سلامتی کمیٹی کے فیصلوں کی توثیق کردی، ذرائع نے بتایا کہ وفاقی کابینہ نے پاکستان اور ایران کے درمیان سفارتی تعلقات بحال کرنے کی منظوری دے دی ،اجلاس میں نگران وزیر خارجہ نے بتایا کہ ایران نے غلط اقدام کیا جس کا جواب دے دیا گیا اب ایران حالیہ کشیدگی ختم کرنا چاہتا ہے، کابینہ اراکان نے بھی اتفاق کیا کہ وہ نہیں چاہتے کہ تعلقات خراب ہوں، پاکستان ہمسایہ ممالک میں سے کسی کے ساتھ بھی کشیدگی نہیں چاہتا۔