نئی دہلی میں اسرائیلی سفارت خانے کے نزدیک دھماکے کے بعد وہاں اسرائیلی باشندوں کو خطرات لاحق ہوگئے۔ اسرائیلی حکومت نے بھارت میں مقیم اپنے باشندوں کی سلامتی یقینی بنانے کے لیے انہیں محتاط رہنے کا مشورہ دیا ہے۔اسرائیلی سلامتی کونسل نے کہا ہے کہ اسرائیلی سفارت خانے کے نزدیک سینترل ہندی ٹریننگ انسٹیٹیوٹ کے مین گیٹ پر ہونے والا دھماکہ تخریب کارانہ گردانہ حملہ بھی ہوسکتا ہے۔بھارت میں اسرائیلی سفارت خانے کے ترجمان گائے نیر نے کہا کہ دہلی پولیس اور اسرائیلی سفارت خانے کی سیکیورٹی ٹیم اس دھماکے کی تحقیقات کر رہی ہیں۔ دھماکے بعد تین گھنٹے تک پورے علاقے میں سرچ آپریشن کیا گیا تھا۔بھارت کی نیشنل انویسٹی گیشن ایجنسی کی ٹیم نے بھی دھماکے کے مقام کا جائزہ لیا تھا۔ اسرائیلی سفارت خانے اور دیگر اسرائیلی تنصیبات کی سیکیورٹی مزید سخت کردی گئی ہے۔اسرائیلی قومی سلامتی کونسل نے اپنے باشندوں کو پرہجوم مقامات پر نہ جانے کا مشورہ دیا ہے۔نئی دہلی میں اسرائیلی سفارت خانہ اور اس کا عملہ حملوں کی زد میں رہا ہے۔ 2021 میں بھی اسرائیلی سفارت خانے کے باہر دھماکہ ہوا تھا جس میں چند گاڑیوں کو نقصان پہنچا تھا۔ اس دھماکے میں کوئی جانی نقصان نہیں ہوا۔فروری 2012 میں اسرائیلی سفارت خانے کے سیکیورٹی اسٹاف کے ایک رکن کی اہلیہ نئی دہلی میں اپنی کار پر حملے میں زخمی ہوئی تھی۔