امریکا نے واضح کیا ہے کہ پاکستان بڑا نان نیٹو اتحادی اور نیٹو پارٹنر ہے، امریکی محکمہ خارجہ کے ترجمان نے کہا ہے کہ علاقائی سلامتی، دفاعی تعاون پر پاکستان کے ساتھ شراکت کے منتظر ہیں۔امریکی محکمہ خارجہ کے ترجمان میتھیو ملر نے کہا ہے کہ پاکستان بڑا نان نیٹو اتحادی اور نیٹو پارٹنر ہے، امریکا علاقائی سلامتی، دفاعی تعاون پر پاکستان کے ساتھ شراکت کا منتظر ہے۔امریکی محکمہ خارجہ کے ترجمان کا بھارتی سپریم کورٹ کے فیصلے پر مزید کہنا تھا کہ جموں و کشمیر میں پیش رفت کو قریب سے دیکھ رہے ہیں۔ان کا کہنا تھا کہ جموں و کشمیر میں سیاسی معاملات بحال کرنے کے بھارتی حکومت کے وعدے پورے کرنے کے منتظر ہیں۔خیال رہے کہ بھارتی سپریم کورٹ نے ملکی آئین میں مقبوضہ کشمیر کی خصوصی حیثیت بحال کرنے کی درخواستیں متفقہ طور پر مسترد کردی تھیں۔ بھارتی سپریم کورٹ نے آئین کے آرٹیکل 370 کو ختم کرنے کا بھارتی حکومت کا فیصلہ درست قرار دیا تھا۔