کونسل آف اسلامک آرگنائزیشنز آف گریٹر شکاگو کا 34واں سالانہ گالا ڈنر 4 اکتوبر 2026 کو اوک بروک ٹیرس، الینوائے کے ڈریوری لین تھیٹرز میں منعقد ہوا، جس میں 900 سے زائد افراد نے شرکت کی۔
اس سال تقریب کا مرکزی خیال ’’ایک امت، ایک شہر، ایمان میں متحد، ایک ساتھ مضبوط‘‘ تھا۔ پروگرام میں شکاگو بھر سے علمائے کرام، مسلم کمیونٹی کے رہنماؤں، کاروباری شخصیات اور سرکاری عہدیداروں نے شرکت کی۔تقریب کا آغاز اورلینڈ پارک مسجد کے امام حسن علی کاسی کی تلاوتِ قرآن پاک اور ترجمے سے ہوا، جبکہ نظامت لینا سلیمان اور ڈاکٹر اسد انصاری نے کی۔ مہمان مقررین میں کک کاؤنٹی بورڈ کی صدر ٹونی پریکنکل، ریاستی نمائندے عبدالناصر راشد اور معروف فلسطینی نژاد امریکی سماجی کارکن ڈاکٹر رامی ناشاشیبی شامل تھے۔کونسل 70 سے زائد مساجد، اسلامی اسکولوں اور کمیونٹی تنظیموں کا اتحاد ہے، جو مسلم کمیونٹی میں اتحاد، قیادت، سماجی خدمات اور شہری شمولیت کو فروغ دینے کے لیے کام کرتا ہے۔تقریب میں کونسل کی وکالت، نوجوانوں کی قیادت کی تربیت اور کمیونٹی روابط کے حوالے سے خدمات پر مبنی خصوصی ویڈیو بھی پیش کی گئی۔ سبکدوش ہونے والے چیئرمین ڈاکٹر عبدالغنی حمادیہ نے اپنے چار سالہ دور کا جائزہ لیتے ہوئے کمیونٹی اتحاد اور مشکلات کا مل کر مقابلہ کرنے کی اہمیت اجاگر کی۔شرکا کو زکوٰۃ شکاگو کی خدمات سے بھی آگاہ کیا گیا، جس کے تحت ضرورت مند افراد کو خوراک، موسم سرما میں امداد اور تعلیمی وظائف فراہم کیے جاتے ہیں۔اپنے خطاب میں ڈاکٹر رامی ناشاشیبی نے مسلم کمیونٹی پر زور دیا کہ وہ معاشرتی مسائل سے کنارہ کشی اختیار کرنے کے بجائے اجتماعی عمل اور مؤثر کردار کے ذریعے ان کا مقابلہ کرے۔ ان کے مطابق کمیونٹی کی اصل طاقت ایمان، اتحاد اور مشترکہ جدوجہد میں ہے۔تقریب کے اختتام پر نبیلہ سید اور زمان قریشی کو لائف ٹائم اچیومنٹ ایوارڈز پیش کیے گئے، جبکہ عالمِ اسلام کی سلامتی اور بہتری کے لیے خصوصی دعا بھی کی گئی۔