ایک نئے سروے میں انکشاف ہوا ہے کہ اسرائیل اور غزہ جنگ کے معاملے پر امریکی یہودی برادری شدید اختلافات کا شکار ہے، جہاں مذہبی اور غیر مذہبی یہودیوں کے خیالات میں نمایاں فرق سامنے آیا ہے۔
ایسوسی ایٹڈ پریس اور نورک سینٹر فار پبلک افیئرز ریسرچ کے مشترکہ سروے کے مطابق مذہبی وابستگی رکھنے والے یہودیوں کی بڑی تعداد اسرائیل کی حمایت کو اپنی شناخت کا اہم حصہ قرار دیتی ہے، جبکہ غیر مذہبی یا ثقافتی بنیادوں پر خود کو یہودی کہنے والے افراد اسرائیل سے کم جذباتی وابستگی رکھتے ہیں اور غزہ میں اس کی فوجی کارروائیوں پر زیادہ تنقید کرتے ہیں۔سروے کے مطابق نصف کے قریب مذہبی یہودی غزہ میں اسرائیلی کارروائیوں کو جائز سمجھتے ہیں، جبکہ غیر مذہبی یہودیوں میں صرف تقریباً پانچ میں سے ایک شخص اس مؤقف کی حمایت کرتا ہے۔ سروے میں یہ بھی سامنے آیا کہ اسرائیل اور غزہ جنگ کے معاملے پر اختلافات کے باعث کئی امریکی یہودیوں کے خاندانی اور سماجی تعلقات بھی متاثر ہوئے ہیں۔